Ağ Ev bazar ertəsi Rusiya prezidenti Vladimir Putinin Ukraynanın şərqindəki regionları müstəqil dövlət kimi tanımasından bir neçə saat sonra Ukraynanın şərqində Rusiya tərəfindən işğal olunmuş Donetsk və Luqansk vilayətlərinə qarşı sanksiyalar tətbiq edib.

Ağ Evin mətbuat katibi Cen Psaki bazar ertəsi axşam bildirib ki, ABŞ “Rusiyadan belə bir addım gözləyirdi və dərhal cavab verməyə hazırdır”.

Prezident Co Bayden Rusiya prezidentinin Ukraynanın Donetsk və Luqansk regionlarının müstəqilliyini tanımasından sonra amerikalıların bu bölgələrə investisiyalar qoymasını və bu bölgələrlə ticarət və maliyyə əlaqələri qurmasını qadağan edən prezident sərəncamı imzalayıb.

Qərarla Rusiyanın Krımı ilhaq etməsinin ardınca 2014-cü ilin mart və dekabr aylarında və 2018-ci ilin sentyabrında verilən fərmanlarda nəzərdə tutulan tədbirlərə yeniləri əlavə edilib.

Qərara əsasən, amerikalıların harada olmalarından asılı olmayaraq “Donetsk Xalq Respublikasına və Luqansk Xalq Respublikasına” yeni investisiyalar, bu bölgələrdən birbaşa və ya dolayı yolla ABŞ-a mal, xidmət və ya texnologiya idxal etmək, ABŞ-dan bu bölgələrə malların, xidmətlərin və ya texnologiyanın birbaşa və ya dolayı yolla ixracı və ya amerikalıların bu regionlar maliyyə əməliyyatları qadağan edilir.

ABŞ-da bu regionların rəhbərləri və yüksək vəzifəli şəxsləri aktivlərinin dondurulması qərara alınıb. Bu şəxslərə maliyyə dəstəyi, sponsorluq, maliyyə resursları, texnoloji dəstək, mal və xidmətlər qadağan edilib.

Putinin Ukraynanın şərqindəki regionlarla bağlı qərarı Qərbin Rusiya prezidentinin hərbi müdaxiləyə başlayacağı ilə bağlı qorxularının daha da artmasına gətirib çıxarıb. Yüksək səviyyəli administrasiya rəsmisi jurnalistlərə bunun çox real təhlükə olduğunu bildirib.

O, Ağ Evin çərşənbə axşamı günü ABŞ-ın hesab etdiyi kimi “beynəlxalq hüququn, Ukraynanın suverenliyi və ərazi bütövlüyünün və Rusiyanın özünün beynəlxalq öhdəliklərinin açıq şəkildə pozulması” ilə bağlı növbəti addımı elan edəcəyini deyib.

Ağ Ev bundan öncə bazar günü axşam ABŞ prezidenti Co Baydenin Rusiya prezidenti Vladimir Putinlə "prinsipcə" və yalnız Rusiya "hərbi əməliyyatlara başlamayacağı təqdirdə" görüşməyi qəbul etdiyini bildirmişdi.

ABŞ administrasiyası bir həftədən artıqdır Rusiyanın istənilən vaxt Ukraynaya müdaxilə edə biləcəyi barədə xəbərdarlıq edir.

Prezident Bayden cümə günü keçirdiyi mətbuat konfransında Putinin Ukraynaya müdaxilə etmək qərarını verdiyini və paytaxt Kiyevin hədəf alınacağını gözlədiyini bildirib.

ABŞ-ın hesablamalarına görə, Rusiyanın Ukrayna sərhədləri boyu ümumilikdə 190 min əsgəri qüvvəsi cəmləşdirilib.