Daha əvvəl təyyarəsinin nasazlığı səbəbindən İsveçrədə çıxılmaz vəziyyətə düşən ABŞ dövlət katibi Antoni Blinkeni şanssızlıq qarabaqara izləyir. ABŞ dövlət katibi bu dəfə təyyarəsi xarab olduğu üçün Brüsseldə NATO Xarici İşlər Nazirlərinin toplantısına maşınla getdiyi bildirilib.

ABŞ Dövlət Departamentinin sözçüsü Blinkeni və ABŞ nümayəndə heyətini daşıyan təyyarənin Parisdə xarab olduğunu və mexaniki nasazlığın aşkar edildiyini bildirib. Buna görə də nümayəndə heyəti Parisdən Brüsselə maşınla getməli olub.

ABŞ dövlət katibi yanvar ayında təyyarəsi sıradan çıxdıqdan sonra İsveçrənin Davos şəhərində kuryoz vəziyyətə düşüb. Dünya İqtisadi Forumunda (WEF) iştirak etdiyi İsveçrədə təyyarəsində yaranan problem səbəbindən ABŞ-a gedə bilməyən Blinken Brüsseldən şəxsi təyyarəsi ilə yola düşməli olub.