İngiltərə kralı III Çarlz Ukrayna sammiti çərçivəsində Londonda olan Ukrayna prezidenti Vladimir Zelenskini qəbul edib. Çarlz bundan əvvəl ABŞ prezidenti Donald Trampı rəsmi olaraq Böyük Britaniyaya dəvət etmişdi.

Kral ailəsinin “X” hesabında edilən paylaşımda Kral Çarlzın bu axşam Norfolkdakı Sandrinqem sarayında Ukrayna prezidenti Zelenski ilə görüşdüyü bildirilib.

Bildirilib ki, Zelenski kral Çarlz tərəfindən səmimi qarşılanıb və görüş bir saatdan az davam edib.

***

Fevralın 27-də Böyük Britaniyanın baş naziri Keir Starmer ABŞ-a rəsmi səfəri zamanı Kral Çarlzın məktubunu ABŞ prezidenti Donald Trampa çatdırıb və onu rəsmi olaraq Böyük Britaniyaya dəvət edib.

Tramp dəvəti alarkən, “Bu, həqiqətən də xüsusi bir hadisədir, daha əvvəl belə olmamışdı. Tezliklə İngiltərəyə səfər edəcəm”, – demişdi.