Prezident İlham Əliyev “İnkişaf etməkdə olan səkkiz ölkənin İqtisadi Əməkdaşlıq Təşkilatının Nizamnaməsi”nə qoşulmaq haqqında” Qanun imzalayıb. Sənəddə deyilir:

“Azərbaycan Respublikasının Milli Məclisi Azərbaycan Respublikası Konstitusiyasının 95-ci maddəsinin I hissəsinin 4-cü bəndini rəhbər tutaraq qərara alır:

Azərbaycan Respublikası 2012-ci il noyabrın 22-də İslamabad şəhərində imzalanmış “İnkişaf etməkdə olan səkkiz ölkənin İqtisadi Əməkdaşlıq Təşkilatının Nizamnaməsi”nə qoşulsun”.

Beləliklə Azərbaycan İnkişaf etməkdə olan Səkkiz Ölkə Təşkilatının (D-8) üzvü oldu.

2024-cü il dekabrın 19-da Misirin paytaxtı Qahirədə keçirilən D-8 Təşkilatının 11-ci zirvə toplantısında Azərbaycan yekdilliklə bu təşkilata üzv qəbul edilib.

İnkişaf etməkdə olan Səkkiz Ölkə Təşkilatı (D-8)

D-8 Təşkilatı 15 iyun 1997-ci ildə İstanbulda yaradılıb. Türkiyə, Banqladeş, Misir, İndoneziya, İran, Malayziya, Nigeriya, Pakistan və Azərbaycanın da daxil olduğu təşkilatın katibliyi İstanbulda yerləşir.

İslam Əməkdaşlıq Təşkilatının (İƏT) üzvü olan D-8 ölkələrinin ümumi əhalisi təxminən 1,2 milyarddır. D-8-in ümumi xarici ticarət həcmi 2,3 trilyon dolları keçərək qlobal ticarətin təxminən 5 faizinə bərabərdir.

Təşkilatın əsas məqsədi inkişaf etməkdə olan ölkələrin dünya iqtisadiyyatında mövqeyini yaxşılaşdırmaq, onların ticarət əlaqələrini şaxələndirmək, üzv ölkələr üçün ticarət sahəsində yeni imkanlar yaratmaq və beynəlxalq səviyyədə qərarların qəbulu mexanizmlərində güclü iştirakını təmin etməkdir.

D-8 sülh, dialoq, əməkdaşlıq, ədalət, bərabərlik və demokratiya prinsiplərinə əsaslanır.

D-8-in əsas fəaliyyət istiqamətləri ticarət, kənd təsərrüfatı və ərzaq təhlükəsizliyi, sənaye, enerji, nəqliyyat və əlaqədir, eyni zamanda səhiyyə və turizm sahələrində də işlər aparılır.