ABŞ prezidenti Donald Tramp Qırmızı dənizdə husilərin həyata keçirdiyi yüzlərlə hücumun “İrandan qaynaqlandığı” fikrini bölüşüb.

Tramp sosial media platforması “Truth Social” hesabında “Heç kim aldanmasın! Yəmən xalqının nifrət etdiyi husilərin, Yəməndə yerləşdirilən şər mafiya və quldurların həyata keçirdiyi yüzlərlə hücumun hamısı İrandan qaynaqlanır”, – deyib.

Tramp Husilərin növbəti hücumlarına və ya qisaslarına böyük güclə cavab veriləcəyini deyib: “Və bu cavabın harada dayanacağına heç bir zəmanət yoxdur”.

Tramp İranın bölgədə nəzarəti itirməsinin həqiqəti əks etdirmədiyini, husilərin hər addımını diktə etdiyini, Yəməndəki qruplaşmanı pul, silah, kəşfiyyat və yüksək inkişaf etmiş hərbi texnika ilə təmin etdiyini iddia edib.

ABŞ-ın husilərin istənilən hücumunu İran tərəfindən həyata keçirilmiş hesab edəcəyini bildirən Tramp, buna görə də İranın Qırmızı dənizdəki bu hücumlara görə məsuliyyət daşıyacağını və Tehran rəhbərliyinin dəhşətli nəticələrə dözməli olacağını bildirib.

Trampın açıqlamaları husilərin ABŞ-ın Yəmənin Hudeydə və Cavf əyalətlərinə 6 hava hücumu təşkil etdiyini elan etməsindən sonra gəlib.

***

ABŞ prezidenti Tramp martın 15-də “Truth” sosial platforması hesabında verdiyi açıqlamada orduya Yəməndə husilərə qarşı “kütləvi hücum” əmri verdiyini açıqlayıb.

Husi lideri Əbdül-Malik əl-Husi açıqlamasında ABŞ təyyarələri və döyüş gəmilərinin husilərin hədəfi olacağını və hücumlarını davam etdirdikcə, dənizdə naviqasiyanın əngəllənməsinin Vaşinqtonu da əhatə edəcəyini bildirib.

İranın dəstəklədiyi husilər ABŞ və İngiltərənin paytaxt Səna da daxil olmaqla bir sıra şəhərlərə endirdiyi hava hücumlarında 53 nəfərin öldüyünü, 98 nəfərin yaralandığını açıqlayıb.