ABŞ prezidenti Donald Trampın iki aylıq səylərinə baxmayaraq, Ukrayna sülh prosesində heç bir irəliləyiş əldə olunmadığı üçün Vaşinqton Moskvaya sanksiya kartını göstərməyə başlayıb. ABŞ Senatında Rusiyaya qarşı yeni sanksiyaları nəzərdə tutan qanun layihəsi hazırlanıb.

Ağ Evin sözçüsü Karolin Livitt ötən gün keçirdiyi mətbuat konfransında hər iki tərəfi günahlandıraraq, “Prezident Tramp həm Rusiya lideri Putinə, həm də Ukrayna lideri Zelenskiyə qəzəblidir. Atəşkəslə razılaşmayan tərəf üçün pis irəliləyişlər ola bilər”, – deyib. Rusiya Trampın dəstəyini itirməkdən narahat olsa da, Kremlin sözçüsü Dmitri Peskov, “Biz müharibəni masa arxasında bitirmək istəyirik. Bununla belə, Kiyev rejimi enerji infrastrukturumuza hücumu davam etdirir və 30 günlük atəşkəsə əməl etmir”, – deyib.

***

Rusiya Putinin xarici işgüzar dairələrlə əlaqə saxlamasını təmin edən Birbaşa İnvestisiya Fondunun rəhbəri Kiril Dmitriyevi də Vaşinqtona göndərir. Dmitriyev Trampın Yaxın Şərq üzrə elçisi Stiv Vitkoffla görüşərək onu inandırmağa çalışacaq ki, “ABŞ-ın həyati maraqları Ukraynanı dəstəkləməkdənsə, Rusiya ilə geniş iqtisadi əməkdaşlıqdadır”.

***

Ukrayna danışıqları davam edərkən, respublikaçı senator Lindsi Qraham və demokrat senator Riçard Blumental Rusiya nefti və təbii qazına dair yeni sanksiya qanun layihəsi hazırladıqlarını açıqlayıblar. Qanun layihəsi qəbul olunarsa, Rusiyadan neft və təbii qaz alan ölkələrə 500 faiz əlavə vergi tətbiq olunacaq. Tramp administrasiyasının təzyiqləri artırmaqla Moskvanı razı salmağa çalışdığı düşünülür.