Ötən ilin aprel ayını Azərbaycan futbol ictimaiyyəti böyük ümidlə gözləyirdi. Dağılmış, dağıdılmış ölkə futbolunda 17 ildən(!) sonra, nəhayət ki, AFFA rəhbərliyində strateji dəyişiklər baş verəcəkdi. Tək əldən səs çıxmır. Az qüvvə, məhdud imkanlarla böyük işlərin görülməsi mümkünsüzdür. Futbol camiəsində birliyin olmamasından, qruplaşmaların bir-biriləri ilə mövqe savaşlarından məharətlə istifadə edildi.

Dəyişiklər baş versə də, bəzi fürsətçilər də bundan yararlandı.

Yeni rəhbərlik plansız, proqramsız gəlsə də, ilk gündən neqativə, tənqidlərə yüklənmədik, əksinə, futbol adına əməli köməyimizi əsirgəmədik. Təki Azərbaycan futbolunda uzun illərdən sonra durğunluğa son qoyulsun, yeni gələnlər keçmişin səhvlərini təkrarlamasın...

Bir il ərzində AFFA rəhbərliyini təmsil edən məsul şəxslərlə dəfələrlə görüşlərim olub. Geniş fikir mübadilələri zamanı ölkə futbolunda mövcud durumla bağlı hansı addımların atılması vacibliyi ətraflı izah edilib, qəti addımlar atılması xüsusi vurğulanıb, vaxtın olmadığı, bir ilin 3-5 mövsümə bərabər olduğu   bildirilib. Ancaq düzgün proqnozlaşdırma, islahatlar, operativlik sayəsində vəziyyətdən çıxış yolları göstərilib.

Vaxt itirildi... 10 aya yaxın İnkişaf Strategiyası hazırlığı ilə məşğul olundu. Lənglik burulğanında geri çəkilmədik, loyal, biganə yanaşmadıq, rəsmi təkliflərimizi irəli sürdük, futbol adına israrla döyüşdük. Nəhayət, mövzu ilə bağlı AFFA Icraiyyə Komitəsində aparılan müzakirələrdən sonra, strategiyanı hazırlayan xarici şirkət nümayəndələri ilə görüşümüzə nail olduq. Belçikalı mütəxəssislərə ölkə futbolunda, bölgələrimizlə bağlı nələrin strategiyada öz əksini tapması kəskin debatlar sayəsində sübuta yetirildi. Strategiya 60-70 faiz tezislərdən ibarət olsa da, böyük çətinliklər bahasına, pərakəndə hala salınsa da, təklif etdiyimiz bir çox konkret  məqamlar da öz əksini tapmış oldu.

Dəyərləndirdik, təşəkkürümüzü bildirdik. Baxmayaraq ki, bəzi təkliflər yeknəsək hala salındı, dəyərləndirilmədi, ən problemli sahələrdən biri sayılan hakimlik məsələsi, ümumiyyətlə, strategiyada öz əksini tapmadı.

İnkişaf Strategiyasının hazırlanmasının daha mükəmməl, ölkə futboluna, yerli şəraitə uyğun hazırlanması üçün, maksimum 1-2 ay kifayət edirdi. Bu, o vaxt baş verirdi ki, başlar santuşlara, milinin D liqasına yuvarlanmasına qarışmışdı. 250-dən çox layihənin hazırlanması isə əlavə vaxt aparacaq.

Bir ilə yaxın gözləyən, İnkişaf Strategiyasını bir nömrəli uğur sayan AFFA rəhbərliyi, nəhayət, vacib sənədin qəbulu zamanı, paralel olaraq limit/limitsizlik məsələsini ortaya atdı. Bununla da aylarla gözlənilən strategiya ikinci plana düşdü. Bizim, dəyərli jurnalistlərin strategiya haqqında müzakirələrimiz, təmənnasız təbliğatımız olmasaydı, ümumiyyətlə, Azərbaycan futbolunun gələcəyini müəyyənləşdirəcək strateji xətt yaddan çıxacaqdı. Və ən acınacaqlısı, bunlar kənardan edilmirdi, federasiyada strateji postlara yiyələnmiş  insanlar tərəfindən həyata keçirilirdi. Dəfələrlə AFFA rəsmilərinə bildirdim, zamanlama çox yanlışdır, prioritet İnkişaf Strategiyasının futbol ictimaiyyətinə detallı çatdırılması olmalı, limit məsələsi də strategiyanın tərkib hissəsinə salınmalıdır. Vaxt qaçmırdı, limit qərarlarını Icraiyyə Komitəsinin növbəti toplantılarında da qəbul etmək olardı ki, İnkişaf Strategiyası gündəmdən düşməsin, “öldürülməsin”. Strateji vəzifələr tutanların İnkişaf Strategiyası ilə bağlı strateji zamanlama yanlışlığı...

Tənqidlər təhlillərə, gələcəyə söykənməlidir. AFFA kabinetlərində nüfuz, səlahiyyət çəkişmələri getdiyi anlarda (səngiməyib, davam edir), biz federasiyada futbolu düşünən insanlarla bərabər, strategiyada futbola aid olmayan, Brüssel və daxili “krot” dəstəsinin təxribat “əməliyyatı”nın qarşısını alırdıq. AFFA səlahiyyətləri nələrin qarşısının alındığını gözəl bilirlər. Qalmaqalların yaşanmaması üçün, qeyd olunanları ictimailəşdirmədik. Bununla yanaşı, görüşlərimizlə paralel, federasiyaya struktur, uşaq futbolu, yarışların keyfiyyətli təşkili, region federasiyaları ilə bağlı əlavə təkliflərimiz, rəsmi məktublarımız göndərilirdi.

Futbolun strateji dirçəlişi, ümumi komponentlərlə birgə, bölgələrdə yaradılan şəraitdən asılıdır. Assosiasiya keçmişdəki kimi idarə edilir, hətta yeni “çalarlar” da qatılır. Bütün üzv qurumlara şəraitin yaradılması mütləqdir, birmənalıdır. PFL, klublar, futzal və sahələr üzrə digər üzv qurumlara dotasiya və sponsor təminatı xətti ilə ümumilikdə 10 milyonlarla vəsait ayrıldığı halda, AFFA-nın özəyini təşkil edən və yaradan bölgə federasiyalarına şərait yaradılmır. Digər federasiyalarla nisbətdə isə BFF İB-nə federasiya bir qara qəpik də dövlət vəsaitindən yardım etməyib. Əvvəlkilər bəlli idi, prinsipial mövqeyimizə görə düşmənçilik edilirdi, yeni gələnlər eyni yolu niyə tutub?!

Belə yanaşma ilə bölgə, uşaq-gənclər futbolu necə inkişaf edə bilər?!

11 aprel tarixində AFFA-nın növbəti Konfransı keçiriləcək. Səsvermə hüququna malik Bakı Futbol Federasiyası xətti ilə, AFFA Nizamnaməsi tələblərinə uyğun olaraq, konfransın gündəliyinə salınması üçün, prosedura qaydalarına əməl edərək, təkliflər irəli sürülüb. Niyə konfransda şablon məsələlərin deyil, həllini gözləyən problemlərin, açıq müzakirələrin aparılması vacibdir? Bir il ərzində rəsmi məktublarımıza cavab verilməyib, görüşlərimizdə qaldırdığımız problemlərə biganə yanaşılıb. Baxmayaraq ki, AFFA öz seçiciləri qarşısında hesabat verməyə borcludur.

Detallara varmadan, AFFA-nın 3 v.-prezidenti - Elşad Nəsirov, Balakişi Qasımov, Sərxan Hacıyev Icraiyyə Komitəsində region federasiyalarını təmsil edirlər. Bir il ərzində nəinki təmsil olunduqları federasiyalara səfər etmək, İcraiyyə Komitəsində şəraitin yaradılması ilə bağlı ciddi müzakirələr aparmaq, imkanların yaradılmasına nail olmaq, bu müddət ərzində assosiasiyada üzv federasiyalarla bir toplantı belə keçirilməyib. Vəziyyətin hazırkı duruma gəlməsində Regional Futbol Federasiyaları da böyük məsuliyyət daşıyır.

AFFA ictimai təşkilat olmaqla yanaşı, özündə federasiyaları birləşdirən ASSOSİASİYADIR və  qrup şirkəti kimi idarə edilməməlidir. Bu gün AFFA-nı idarə edənlər şəxsi vəsaitlərini futbola yatırmırlar, dövlətin, sponsorların, FİFA və UEFA-dan gələn maliyyə ilə federasiya qidalanır. Keçmişin səhvlərini daha 15 il xərcləmək yox, səhvlərdən nəticə çıxarılmalı, ayrılan vəsait səmərəli istifadə edilməli, artıq qəbul edilən və hazırlamnasında əməli və faktiki iştirak etdiyimiz İnkişaf Strategiyası Nizamnamə tələblərinə uyğun yerinə yetirilməlidir.