İranın nüvə proqramında əsas fiqur sayılan nüvə alimi Möhsün Fahrizadəyə 2020-ci ildə edilən sui-qəsdlə bağlı yeni təfərrüatlar ortaya çıxıb. Məlum olub ki, bu hücum İsrailin xarici kəşfiyyat xidməti “MOSSAD” tərəfindən uzaqdan idarə olunan avtomatik silah vasitəsilə həyata keçirilib.

Fəxrizadənin öldürülməsi ilə bağlı məsuliyyəti rəsmi şəkildə heç vaxt üzərinə götürməyən İsrail, buna baxmayaraq, bu yaxınlarda “The Jerusalem Post” qəzetində yayımlanan xəbərdə hadisənin detalları açıqlanıb. Bildirilib ki, Fəxrizadə 27 noyabr 2020-ci ildə avtomobilində oturarkən ilk dəfə atəşə tutulub. Onun sağ qaldığını ehtimal edən “MOSSAD” agentləri, o, maşından çıxmağa çalışarkən atəşi davam etdiriblər. Fəxrizadənin qısa müddət sonra həyatını itirdiyi deyilir.

Yeni yayılan məlumatlar, hadisə ilə bağlı İran rəsmilərinin verdiyi açıqlamaları da təsdiqləyir. İranın Ali Milli Təhlükəsizlik Şurasının katibi general Əli Şəmxani, Fəxrizadənin peykə qoşulmuş uzaqdan idarə olunan pulemyotla öldürüldüyünü demişdi.

İsrail kəşfiyyat mənbələri də sonradan bu açıqlamanı dəstəkləyən təfərrüatlar təqdim edib. Belə ki, ABŞ istehsalı olan “M240C” 7.62 mm pulemyot hissələrə ayrılaraq İrana gizli şəkildə daxil edilib və təxminən 20 nəfərlik “MOSSAD” qrupu tərəfindən 8 ay müddətində yığılaraq hazır hala gətirilib.

Silahın Tehranın İmam Xomeyni küçəsində park edilmiş mavi “Zamyad” markalı yük maşınına yerləşdirildiyi, əməliyyat zamanı Fəxrizadənin yanında olan həyat yoldaşına zərər vurmamaq və riskin minimuma endirilməsi üçün uzaqdan idarə olunduğu bildirilir.

Hədəfi təsdiqləmək üçün kamera ilə təchiz olunmuş ikinci bir avtomobildən də istifadə edildiyi deyilir. Lakin bu iddialar hələlik müstəqil mənbələr tərəfindən təsdiqlənməyib.

Fəxrizadə Qərb və İsrail kəşfiyyatına görə İranın nüvə proqramında əsas beyin hesab olunurdu. Onun ölümü İran tərəfindən böyük itki kimi qiymətləndirilmiş, “şəhid” elan edilmiş və dövlət səviyyəsində vida mərasimi təşkil olunmuşdu.

İranlı mənbələrə əsasən, “MOSSAD” Fəxrizadəni hədəfə almağı hələ 2009-cu ildə, “MOSSAD”ın o vaxtkı rəhbəri Meir Dağan dövründə planlaşdırmışdı. Lakin əməliyyatın mümkünlüyü ilə bağlı daxili müzakirələr onun həyata keçirilməsini gecikdirdi.

2020-ci ilə gəldikdə isə Fəxrizadənin əməliyyat baxımından rolu müəyyən qədər dəyişmiş olsa da, strateji əhəmiyyəti və fars-molla rejiminin lideri Ayətullah Əli Xameneyi ilə əlaqəsi dəyişməz qalmışdı.

Ekspertlərə görə, Fəxrizadənin öldürülməsi İranın nüvə proqramını aylar, hətta illərlə geri saldı və İsrailin gizli əməliyyat və kəşfiyyat imkanlarını daha da gücləndirdi.