FinCEN (Financial Crimes Enforcement Network – Maliyyə Cinayətlərinə Qarşı Mübarizə İdarəsi) Meksika mənşəli narkotik kartellərinin Çinli pul yuyulması şəbəkələrindən istifadə etdiyini müəyyənləşdirmək üçün tövsiyə xarakterli bir sənəd yayımlayaraq, ABŞ-da bu şəbəkələrin fəaliyyətinə dair maliyyə meyllərini analiz edib.

ABŞ Maliyyə Nazirliyindən mövzu ilə bağlı verilən açıqlamada, ölkədəki Çinli pul yuyulması şəbəkələrinin genişliyinə diqqət çəkilərək, bu şəbəkələrin kartellər tərəfindən qanunsuz gəlirləri yumaq və digər qeyri-qanuni fəaliyyətlərdə iştirak etmək üçün istifadə olunduğu bildirilib.

Açıqlamada, Çinli pul yuyulması şəbəkələrinin müxtəlif üsullar tətbiq etdiyi və maliyyə qurumları daxilindən əməkdaşlar işə götürə biləcəyi qeyd olunub. Həmçinin, bu şəbəkələrin müxtəlif cinayətlərdən əldə olunan qanunsuz gəlirlərlə maliyyələşdirilən daşınmaz əmlak alışlarını asanlaşdırma potensialına malik olduğu vurğulanıb.

Açıqlamada fikirlərinə yer verilən Terrorizm və Maliyyə Kəşfiyyatı üzrə Dövlət Katibi Con Harli (John Hurley) Çin pasportu olan şəxslərlə əlaqəli pul yuyulması şəbəkələrinin kartellərə amerikalıları fentanil ilə zəhərləmək və insan qaçaqmalçılığı həyata keçirmək imkanı verdiyini bildirib.

Harli ABŞ-ın pis niyyətli aktorların maliyyə sistemi vasitəsilə qanunsuz gəlirlərini yumağa göz yummayacağını vurğulayıb və yayımlanan sənədlərin maliyyə qurumlarının qanunsuz fəaliyyətləri daha yaxşı müəyyən etməsinə kömək edəcəyini qeyd edib.

FinCEN direktoru Andrea Qakki (Andrea Gacki) isə qlobal və geniş yayılmış Çinli pul yuyulması şəbəkələrinin aradan qaldırılmasının vacibliyini vurğulayıb.