Rusiyanın Xarici İşlər Naziri Sergey Lavrov bildirib ki, Rusiyaya qayıtmaq istəyən qərblilərdən intiqam almaq niyyətində deyillər. Rusiya dövlət başçısı Vladimir Putin ilə ABŞ Prezidenti Donald Trampın Alyaskada görüşünün bunu göstərdiyini vurğulayan Lavrov, Ukraynadakı böhranın əsas səbəblərinin aradan qaldırılması lazım olduğunu qeyd etdi.

ABŞ-ın Ukraynanın NATO-ya üzvlük məsələsini bağlamalı olduğunu anladığını söyləyən Lavrov, “Qərb uzun illər ərzində Ukraynaya milyardlarla dollar axıdaraq orada özünə tam itaət edəcək, NATO-ya üzvlükdən imtina etməyəcək və Avropa Birliyi də daxil olmaqla qərb strukturlarına tabe olacaq bir rejim qurdu”, – dedi.

Lavrov Rusiya və Qərb münasibətlərinə toxunaraq, qərblilərin Rusiyaya dönüb yenidən əməkdaşlıq etmək istədikdə onları uzaqlaşdırmayacaqlarını qeyd etdi. Ancaq bunun üçün şərtlərin yaradılacağını, siyasi rəhbərlərinin əmri ilə Rusiyadan qaçaraq etibarsız olduqlarını da nəzərə alacaqlarını bildirdi. “Heç kimsədən intiqam almaq, qəzəbimizi kimsədən çıxarmaq istəmirik”, – deyə Lavrov əlavə etdi.

Rusiyanın və ABŞ-ın müxtəlif sahələrdə əməkdaşlıq imkanlarını şərh edən Lavrov, “İqtisadiyyat, Alyaska da daxil olmaqla mayeləşdirilmiş təbii qaz istehsalı və daha çox maraqlı imkanlar mövcuddur. Ümumilikdə Arktika, kosmos da daxil olmaqla geniş əməkdaşlıq sahələri var”, – dedi.

Doların istifadəsinin azaldılması və alternativ ödəniş platformalarının yaradılması prosesinin davam etdiyini bildirən Lavrov əlavə etdi: “Normal ticarət üçün zəruri olan alternativ platformaların, ödəniş və digər logistika mexanizmlərinin yaradılması tendensiyası davam edir.”

Trampın keçmiş ABŞ Prezidenti Co Baydeni “doların qlobal rezerv valyuta rolunu təhlükəyə atmaqda” tənqid etməsindən sonra, dollarla bağlı atılan addımların məntiqsiz göründüyünü deyən Lavrov bildirdi: “Təəssüf ki, Tramp administrasiyasında maliyyədən məsul olanlar, ən azından liderləri barədə bu qiymətləndirmədən hələ nəticə çıxarmayıblar”.