«Kremllə Vaşinqton arasında bütün səviyyələrdə danışıqlar dondurulub və Moskva buzların tezliklə əriyəcəyini gözləmir».

Bunu Kremlin sözçüsü Dmitry Peskov «Mir TV»yə müsahibəsində deyib. Onun sözlərinə görə, tərəflər ya heç danışmır, ya da minimal danışıqlar aparırlar və münasibətlər yeni prezident Donald Tramp iş başına keçən kimi düzələsi deyil. D.Peskov buna iki məsələnin—NATO-nun genişlənməsinin və Rusiyaya qarşı sanksiyaların səbəb olduğunu söyləyib.

Rusiya prezidenti Vladimir Putin də dekabrın 21-də sanksiyalar haqda danışıb, onların ölkələri cəbhələrə ayırdığını, ümumi bəlaya - terrora qarşı cəhdləri birləşdirməyə imkan vermədiyini deyib.

D.Tramp seçki kampaniyası zamanı Rusiyayla münasibətləri yoluna qoyacağına, terrorla Moskvayla birgə mübarizə aparacağına söz verib.

Dövlət Departamentinin sözçüsü Con Kirbi D.Peskovun dediklərini təkzib edib. Fikir ayrılıqlarına baxmayaraq, Vaşinqtonun Moskvayla dialoqu davam etdirdiyini söyləyib.