Təkrarsız çıxışları ilə uzun illər boyu Azərbaycanı beynəlxalq arenada uğurla təmsil edən həmyerlimiz Araz Həmzəyev indi də dünyanın bir nömrəli Kanadanın Cirque du Soleil (“Günəş sirki”) sirkinin Las-Veqasdakı proqramına dəvət alıb. SİA-nın məlumatına görə, baş ofisi Kanadanın Monreal şəhərində yerləşən Cirque du Soleil dünyada analoqu olmayan nəhəng bir sirk korporasiyasıdır. Bu sirkin hər bir proqramı üzərində böyük yaradıcı qrup çalışır. Sirk artistləri, rejissor, xoreoqraf, geyim və qrim ustaları, səs rejissorları və başqa sənət sahibləri bir araya gələrək maraqlı süjetə malik baxımlı, rəngarəng, qeyri-adi tamaşalar yaradırlar. Əsası 1984-cü ildə qoyulan Cirque du Soleil sirkinin tamaşaları dünyanın 280-dən artıq şəhərində nümayiş edilmişdir. Hazırda “Günəş sirki”ndə 40 fərqli millətə mənsub 4 min adam çalışır.