«The Telegraph» qəzeti yazır ki, ABŞ milyarderi Maykl Blumberq (Michael Bloomberg) prezident Donald Tramp Amerikanın Paris İqlim Sazişindən çıxdığını elan edəndən dərhal sonra BMT-yə iqlim məsələləri ilə bağlı «öz cibindən» 15 milyon dollar xərcləmək niyyətini açıqlayıb.

Bu pul BMT-nin İqlim Dəyişikliyi İcraiyyə Katibliyinin çərçivə Konvensiyasına dəstək kimi verilir.

Bu barədə qərarın altına «Blumberq insanpərvərləri» imzası qoyulub.

«Amerikalılar Paris İqlim Sazişindən çıxmırlar, - deyib Maykl Blumberq, - Əksinə, biz iştirakımızı daha da inkişaf etdiririk».

Blumberq deyib ki, «amerikalılar Paris razılaşmasına əvvəldən axıradək əməl edəcəklər».

«Vaşinqton bizi dayandırmaq üçün heç nə edə bilməz», - deyib milyarder.

2002-2013-cü illərdə Nyu York şəhərinin meri olmuş 75 yaşlı Blumberq «Forbes»in zənginlər siyahısında 8-ci şəxsdir.

O həmçinin Şəhərlər və İqlim Dəyişikliyi üzrə BMT-nin xüsusi elçisidir.

Bundan əvvəl prezident Donald Tramp Amerikanın iqlim dəyişikliyi ilə bağlı bütün razılaşmalardan çıxdığını bəyan etmişdi.

Milyarder deyib ki, ABŞ-ın hər iki partiyasından olan liderlər və biznes başçıları BMT-yə dəstək bəyannaməsini birlikdə imzalayacaqlar.

«Biz Paris razılaşmasına uyğun olaraq Amerikanın bütün öhdəliklərini yerinə yetirəcəyik», - deyib Blumberq.