«The Guardian» qəzeti yazır ki, ABŞ-da xüsusi prokuror Robert Müller (Robert Müller) prezident Trampın keçmiş milli təhlükəsizlik müşaviri Maykl Flinnə (Michael Flynn) və onun oğluna qarşı cinayət işi qaldırmaq üçün kifayət qədər dəlillərə malikdir.

Müller Tramp komandası ilə Rusiya rəsmiləri arasında mümkün sövdələşməni araşdırır.

Bir neçə mənbəyə istinad edən NBC xəbər verir ki, Müllerin komandası çirkli pulların yuyulması və dövlət orqanlarına yalan məlumat verilməsi kimi ittihamları irəli sürə bilər. Söhbət həm də Flinnin milyonlarla dollar rüşvətin müqabilində Türkiyə prezidentinin bir «opponentinin» Amerikadan çıxarılmasından gedir.

Bu xəbərləri dərhal təsdiq etmək mümkün olmayıb. Oğul Maykl Flinnin vəkili Berri Koburn (Barry Coburn) şərh verməkdən imtina edib.

Oğul Flinn rəsmi şərh verməsə də «Twitter»də yazıb ki, «sosial ədalət cəngavərləri» yenə də onun ovuna çıxıblar, amma onu həbsxanaya göndərə bilməyəndə möhkəm pərt olacaqlar.

«The Guardian» yazır ki, Trampın keçmiş kampaniya rəhbəri Pol Manafort (Paul Manafort) və onun biznes şəriki Rik Geytsə (Rick Gates) cinayət işi qaldırlandan və prezidentin keçmiş xarici işlər müşaviri Corc Papadopulosun (George Papadopoulos) ifadə verməyə hazırlaşdığı barədə xəbərlər yayılandan sonra respublikaçılar və Ağ Ev Müller üzərinə təzyiqi artırıblar.

Müller isə öz növbəsində Manafortun üzərinə təzyiqləri artırmaqla məşğuldur.

Buna baxmayaraq Nümayəndələr Palatasının respublikaçı spikeri Pol Ryan (Paul Ryan) deyib ki, Müller nə vəzifəsindən uzaqlaşdırıla, nə də istefa verə bilər.

O deyib ki, peşəkarlara öz işlərini normal şəraitdə görmək imkanı tanınmalıdır.

«Mən düşünmürəm ki, o işdən çıxarılmalı və ya istefa verməlidir», - Ryan «Fox News» kanalına deyib.

Flinn cəmi 24 gün ərzində Trampın milli təhlükəsizlik müşaviri ola bilib. O, Rusiya diplomatı ilə kommunikasiyaları barədə vitse-prezidentə yanlış məlumat verdiyinə görə vəzifəsindən azad edilib.

NBC xəbər verib ki, Flinn və onunla birlikdə işləmiş oğlu Maykl G. Flinn şərh verməkdən boyun qaçırıblar. Xüsusi prokuror Robert Müllerin də komandası şərh verməyib.