ABŞ Məxfi xidmət hadisə zamanı ABŞ-ın keçmiş prezidenti Donald Trampa silahla sui-qəsd etməyə cəhd edən hücumçunun Trampa necə bu qədər yaxınlaşa bildiyini araşdırır. Ölkə ictimaiyyəti də hadisəni başvermə səbəbini sual altına alır.

“Associated Press” (AP) mitinqdə çəkilmiş onlarla video və foto, habelə peyk görüntüləri vasitəsilə keçmiş prezident Trampa hücumu təhlil edib.

Təhlillərə görə, bu məlumatlar sui-qəsdçinin Trampın çıxış etdiyi səhnəyə “təəccüblü” yaxınlaşa bildiyini göstərir.

Sosial şəbəkələrdə yayılan videolara görə, Trampın mitinqinin keçirildiyi ərazinin şimalında yerləşən istehsal müəssisəsinin damında boz kamuflyaj geyinmiş kişi cəsədinə rast gəlinir.

Dam Trampın danışdığı yerdən 150 metr aralıdadır və bu məsafə ABŞ ordusuna yeni başlayanların əsas təlimlərində “M16” tipli avtomatik tüfənglə insan ölçülü hədəfləri vurmalarının tələb olunduğu məsafəyə uyğundur. Təcavüzkarın istifadə etdiyi “AR-15” avtomatı, “M16”nın yarı avtomatik mülki modelidir.

Adının açıqlanmasını istəməyən və AP-yə danışan iki hüquq-mühafizə orqanı rəsmisi bildirib ki, ABŞ Məxfi xidməti hücumçunun Trampa necə bu qədər yaxınlaşdığını araşdırır.

Rəsmilər hücum zamanı məxfi xidmətin snayper komandası və əks-hücum komandasının mitinqdə olduğunu bildirib.

Digər tərəfdən, Daxili Təhlükəsizlik Katibi Alexandro Mayorkas verdiyi açıqlamada, Departament və Məxfi Xidmətin silahlı hücumu araşdırmaq üçün hüquq-mühafizə orqanları ilə birlikdə çalışdığını bildirib.

Mayorkas qeyd edib ki, prezidentliyə namizədlərin təhlükəsizliyinin təmin edilməsi və seçki kampaniyası çərçivəsində həyata keçirilən tədbirlər onun ən həyati prioritetlərindən biridir.

“Biz bu hücumu ən sərt şəkildə qınayırıq və sürətli addım atdıqlarına görə Məxfi xidməti alqışlayırıq. Biz prezident Bayden, keçmiş prezident Tramp və onların kampaniyalarında iştirak edən seçki qərargahının  üzvləri ilə əlaqə saxlayırıq və onların təhlükəsizliyini təmin etmək üçün bütün mümkün tədbiri görürük”,  – deyə Mayorkas bildirib.

BBC-nin məlumatına görə, Trampın mitinqdə məruz qaldığı hücum “təhlükəsizlik zəifliyi” ilə bağlı müzakirələrə səbəb olub.

***

Respublikaçılardan prezidentliyə namizədliyini irəli sürən keçmiş ABŞ prezidenti Tramp Pensilvaniyada mitinqdə tribunadan tərəfdarları qarşısında çıxış edərkən silahla hücuma məruz qalıb.

Sağ qulağından yaralanan Trampın səhhətinin yaxşı olduğu bildirilib.

Hadisədə mitinqdə iştirak edən 1 nəfər ölüb, 2 nəfər yaralanıb.

ABŞ Məxfi xidməti hücumda şübhəli bilinən şəxsin mitinq sahəsinin kənarındakı hündür yerdən podiumun olduğu nöqtəyə qədər dəfələrlə atəş acdıb. Cavab atəşləri ilə su-qəsdçinin zərərsizləşdirildiyi açıqlanıb.

ABŞ Federal Təhqiqat Bürosu (FTB) hücumu “sui-qəsd cəhdi” kimi qiymətləndirib.

FTB Trampa qarşı sui-qəsdi təşkil edən şəxsin 20 yaşlı Tomas Metyu Kruks olduğunu açıqlayıb.