ABŞ-ın müdafiə naziri Lloyd Ostin, Yaponiyanın müdafiə naziri Kihara Minoru və Cənubi Koreyanın müdafiə naziri Şin Von-Zik Yaponiyada bir araya gələrək təhlükəsizlik sahəsində üçtərəfli əməkdaşlığı müzakirə ediblər.

Təhlükəsizlik sahəsində əməkdaşlığa sadiqliklərini təkrarlayaraq, nazirlər regionda təhlükəsizlik problemləri ilə bağlı məsləhətləşmələr aparmaqla Koreya yarımadası və Hind-Sakit okean kimi regionlarda sülh və sabitliyə töhfə verməyə hazır olduqlarını bildiriblər. Şimali Koreyanı nüvə və raket təhdidlərindən çəkindirmək üçün işlərini davam etdirəcəklərinə diqqət çəkən Ostin, Şin və Kihara Rusiya ilə Şimali Koreya arasında artan hərbi və iqtisadi əməkdaşlıqdan narahatlıqlarını ifadə ediblər.

Tərəflər Şimali Koreyanın nüvə sistemlərinin şaxələndirilməsini və ballistik raket sınaqları və buraxılışlarını pisləyib və Pxenyan rəhbərliyini bu fəaliyyətləri dayandırmağa çağırıblar.

Məlumat mübadiləsi, məsləhətləşmələr, üçtərəfli təlim və müdafiə məqsədləri də daxil olmaqla təhlükəsizlik sahəsində üçtərəfli əməkdaşlığa dair anlaşma memorandumu da tərəflər tərəfindən imzalanıb.

Pentaqonun verdiyi açıqlamaya görə, ABŞ müdafiə naziri Ostin Tokioda Cənubi Koreyalı həmkarı Şin ilə ikitərəfli görüşündə Şimali Koreyanın zibil şarı göndərmə fəaliyyətləri ilə bağlı fikirlərini bölüşüb. Ostin və Şin Pxenyan administrasiyasını bu təxribatçı fəaliyyətləri dərhal dayandırmağa çağırıb.

Şimali Koreyalı qaçqınlar və Cənubi Koreyadakı fəallar Şimala Pxenyanı tənqid edən təbliğat vərəqələri ilə dolu böyük şarlar göndərmişdilər. Buna cavab olaraq Şimali Koreya mayın sonunda Cənubi Koreyaya 2 mindən çox zibil daşıyan şar göndərib.