Almaniya kansleri Olaf Şolz Rusiyanın illərdir kütləvi silahlanmasını tənqid edib və bəyan edib ki, Ukraynaya hücum etməklə Avropanın sülh nizamının əsaslarını məhv edib.

Şolz, Todendorf qəsəbəsində “İris-T SLM” hava hücumundan müdafiə sisteminin istifadəyə verilməsi mərasimindəki çıxışında Rusiya prezidenti Vladimir Putinin Ortamənzilli Nüvə Qüvvələr Sazişindən çıxmaqla tərksilah müqavilələrini pozduğunu qeyd edərək, “Raketləri Berlindən 530 kilometr uzaqda olan Kalininqrada Putin göndərdi. Müvafiq reaksiya verməmək səhlənkarlıq olardı”, – deyib.

“İris-T SLM” hava hücumundan müdafiə sisteminin Almaniyada fəaliyyətə başlamasının əhəmiyyətinə diqqət çəkən Şolz, “Bu, mübaliğəsiz, Avropada təhlükəsizliyin və sülhün qorunmasına dair bir layihədir. Rusiya bütün Ukraynaya hücum edərək, Avropa sülh nizamımızın ən əhəmiyyətli təməlini məhv etdi. Rusiya, uzun illərdir ki, xüsusilə qanadlı raketlər sahəsində kütləvi şəkildə silahlanıb”, – deyib.

“İris-T SLM”nin Almaniyanın təhlükəsizliyinə töhfə verəcəyini vurğulayan kansler, “Bu, uzun müddətdir hava hücumundan müdafiəyə laqeyd yanaşdıqdan sonra ölkəmizin təhlükəsizliyi üçün əhəmiyyətli bir addımdır. Həm də Avropanın təhlükəsizliyi üçün vacib addımdır. Yeni silah sistemi Almaniya tərəfindən yaradılıb və hazırda 21 ölkənin iştirak etdiyi Avropanın “Sky Shield” hava hücumundan müdafiə sisteminin mərkəzi komponenti olacaq”, – deyib.

Şolz həmçinin, Ukraynaya çatdırılan dörd “İris-T SLM” sistemi ilə yüzlərlə Rusiya qanadlı raketinin, pilotsuz uçuş aparatının və raketinin vurulduğunu və çoxlu insanın həyatının xilas edildiyini bildirib.

Müdafiə naziri Boris Pistorius da ilk “İris-T SLM” hava hücumundan müdafiə sisteminin tətbiqinin tarixdə dönüş nöqtəsi olduğuna inandığını bildirib.

Pistorius qeyd edib ki, Şlezviq-Holşteyn əyalətinin Baltik sahilindəki Todendorf bölgəsi gələcəkdə ölkəsinin hava hücumundan müdafiə qüvvələrinin mərkəzi olacaq.