ABŞ prezidenti Donald Tramp dünən axşam Rusiya prezidenti Vladimir Putinlə telefon görüşməsinin ardından Oval kabinetdə jurnalistlərin qarşısına çıxıb.

Donald Tramp Vladimir Putinlə telefonla danışığında Rusiya prezidentinin sülh istədiyini, Co Bayden dövründə isə bu istəyin olmadığını bəyan edib.

Donald Tramp Ukrayna prezidenti Vladimir Zelenski haqqında da tənqidi açıqlamalar verib. “Ukraynanın itirdiyi ərazilərdən imtina edib-etməyəcəyi ilə bağlı”, – suala Tramp, “O, üzərinə düşəni edəcək. Amma sorğular yaxşı görünmür”, – deyib.

Ukraynada seçkilərin keçirilməli olduğunu deyən Tramp bildirib ki, Zelenski nə vaxtsa seçkiləri təşkil etməli olacaq.

Digər tərəfdən, ABŞ-ın müdafiə naziri Pit Heqset NATO-nun qərargahında verdiyi açıqlamada Ukraynanın 2014-cü ildən əvvəlki sərhədlərinə qayıtmasının real hədəf olmadığını bildirib. Mövzu ilə bağlı açıqlama verən Tramp da, 2014-cü ildən əvvəlki sərhədlərə qayıtmağın çətin olduğunu ifadə etməklə Pentaqon rəhbəri ilə həmfikir olduğunu göstərib.

Ukraynanın NATO-ya daxil olması ilə bağlı Tramp “Ukraynanın NATO-ya üzv olmayacağını deyirlər, bu mənim üçün problem deyil... Onun NATO-ya daxil olması praktiki olaraq mümkün deyil”, – deyib.

Tramp həmçinin Putinlə mümkün görüşü ilə bağlı proqnoz verib və görüşün “yəqin ki, Səudiyyə Ərəbistanında baş tutacağını”, – deyib.