ABŞ və Rusiya nümayəndə heyətləri ikitərəfli münasibətləri normallaşdırmaq və Ukraynada müharibəyə son qoymaq məqsədilə danışıqlara başlayıb. Ötən həftə ABŞ prezidenti Donald Tramp və Rusiya prezidenti Vladimir Putin arasında telefon danışığından sonra hər iki ölkənin nümayəndə heyətləri Səudiyyə Ərəbistanının paytaxtı Ər-Riyadda bir araya gəlib.

Danışıqlarda Rusiya nümayəndə heyətinə xarici işlər naziri Sergey Lavrov, Kremlin xarici siyasət müşaviri Yuri Uşakov və Rusiya Birbaşa İnvestisiya Fondunun prezidenti Kiril Dmitriyev, ABŞ nümayəndə heyətinə isə dövlət katibi Marko Rubio, Ağ Evin milli təhlükəsizlik üzrə müşaviri Mayk Vals və Yaxın Şərq üzrə xüsusi nümayəndə Stiv Vitkoff daxildir.

Bağlı qapılar arxasında keçirilən görüşün sonunda Rusiya nümayəndə heyətinin mətbuat konfransı keçirəcəyi gözlənilir.

***

ABŞ Dövlət Departamentinin sözçüsü Tammi Bryus Ər-Riyadda jurnalistlərə, “Bu, Putin və Prezident Tramp arasında ilk addımın mümkün olub-olmaması, hansı risklərin olması və bunun idarə oluna biləcəyi ilə bağlı ilkin söhbətin davamıdır”, – deyib.

Kreml bildirib ki, danışıqlar “Rusiya-Amerika münasibətlərinin bütün kompleksini” əhatə edəcək və Ukrayna üzrə mümkün razılaşmaya və iki prezident arasında görüşə hazırlıq olacaq.

Rusiya tərəfi həmçinin bildirib ki, Lavrov və Rubio 15 fevral şənbə günü telefon danışığı zamanı iki ölkə arasında ticarət və investisiya maneələrinin aradan qaldırılmasını müzakirə ediblər.

Danışıqlarda iştirak etməyən Ukrayna prezidenti Vladimir Zelenski, “Ər-Riyadda onun adına sülh sazişi bağlana bilməz”, – deyib.