Tramp Floridadakı Mar-a-Laqo malikanəsində keçirdiyi mətbuat konfransında Rusiya-Ukrayna müharibəsi gündəmini dəyərləndirib.

Səudiyyə Ərəbistanındakı danışıqların yaxşı başladığını və prosesin yaxşı gedəcəyinə ümid etdiyini qeyd edən Tramp müharibədə yüz minlərlə əsgərin öldüyünü və bunun indi bitməli olduğunu bildirib.

Tramp Ukraynanın Səudiyyə Ərəbistanında ABŞ-Rusiya danışıqlarına niyə dəvət edilməməsinə də aydınlıq gətirib.

Ukraynanın müharibəni daha əvvəl bitirmək imkanının olduğunu, lakin Co Bayden administrasiyasının dəstəyi ilə müharibəni davam etdirməyə üstünlük verdiyini müdafiə edən Tramp deyib: “Bu gün eşitdim ki, “Bizi dəvət etməmişdilər” deyiblər. Siz bunu üç il əvvəl bitirməli idiniz. Siz buna heç vaxt başlamamalı idiniz. Siz əvvəllər razılaşa bilərdiniz. Mən Ukrayna üçün müqavilə bağlaya bilərdim, demək olar ki, bütün ərazilərini onlara verə bilərdim. Amma onlar bunu belə etməməyi seçdilər. Prezident Bayden isə bu, nə qədər səhv idi”.

Rusiyanı müharibənin səbəbkarı kimi göstərməyən Tramp, həm Baydenin, həm də Zelenskinin zəif liderliklərinə görə heç vaxt başlamamalı olan müharibənin qapısını açdıqlarını iddia edib.

Digər tərəfdən Tramp avropalı sülhməramlıların Ukraynada yerləşdirilməsi ehtimalına açıq olduğunu açıqlayıb və belə bir təklifi dəstəkləyib.

Sülh planının bir hissəsi kimi Ukraynaya avropalı sülhməramlıların yerləşdirilməsi ideyası barədə nə düşündüyünü soruşduqda, Tramp, “Əgər onlar bunu etmək istəyirlərsə, bu, əladır. Mən bunun tərəfdarıyam”, – cavabını verib.

Fransa və İngiltərə kimi ölkələrin bu ideyadan danışdıqlarını xatırladan Tramp, “Sülh müqaviləsi bağlasaq, Avropa baxımından çox uzaqda olduğumuz üçün oraya əsgər göndərmək məcburiyyətində qalmayacağımızı düşünmürəm, amma orada əsgərlərin olması yaxşı olardı. Buna qətiyyən etiraz etməzdim”, – deyib.

Fransanın bu məsələdə xüsusi həvəsli olduğunu bildiyini bildirən Tramp belə bir addımın “gözəl jest” olacağını qeyd edib.

ABŞ prezidenti həmçinin bildirib ki, Ukraynada mövcud vəziyyətə görə hərbi vəziyyət qüvvədədir, uzun müddətdir seçkilər keçirilmir, lakin xalq prezident Vladimir Zelenskidən çox da razı deyil.

“Biz (Ukraynada) seçki keçirməmişik. Bu, Rusiya ilə bağlı deyil. Bu, məndən və bir çox başqa ölkələrdən gəlir. Ukraynanın şəhərləri sözün əsl mənasında xarabalığa bənzəyir. İnsanlar bundan beziblər. İnsanlar nəyinsə baş verdiyini görmək istəyir”, – Tramp deyib.

Tramp ABŞ qoşunlarını Avropadan çıxarmaq fikrində olmadığını bildirib.