“The Associated Press”, “Bloomberg News” və “Reuters” dünən bəzi medianın Ağ Evin girişini məhdudlaşdırmaq qərarını pisləyib.

ABŞ-ın “The Associated Press” və “Bloomberg News”, Kanada-Britaniyanın “Reuters” agentliyi birgə bəyanatda bildiriblər ki, “demokratiya şəraitində cəmiyyətin azad və müstəqil mətbuat vasitəsilə hökumət xəbərlərinə çıxışı olması vacibdir. Biz hesab edirik ki, dövlətin prezidentə çata biləcək xəbər agentliklərinin sayını məhdudlaşdırmaq üçün gördüyü hər hansı tədbir bu prinsipi təhdid edir”.

Ağ Ev hazırda “The Associated Press”i prezidentlə bağlı xəbərləri işləməyə icazə verilən məhdud jurnalistlər dairəsindən kənarlaşdırıb. Administrasiya xəbər agentliyini Trampın Meksika körfəzinə “Amerika Körfəzi” adlandırmaq qərarına əməl etmədiyinə görə tənqid edib. “The Associated Press” keçən həftə üç administrasiya rəsmisinə qarşı qanuni tədbir görüldüyünü bildirmişdi.

Ağ Ev çərşənbə axşamı medianın işıqlandırılmasına nəzarəti bərpa etmək istəyini təsdiqləyərək, ilk növbədə Oval kabinetdə prezidentə birbaşa çıxışı olan kiçik bir jurnalist qrupunu seçəcəyini elan etdi. Bu, onilliklər əvvəl yaradılmış və Ağ Ev Müxbirlər Assosiasiyası vasitəsilə medianın özü tərəfindən idarə olunan sistemdən bir fasilə deməkdir.

Əvvəlki dövrdə “The Associated Press”, “Bloomberg News” və “Reuters” siyahıda daimi yer tuturdu. Məlumata görə, “Reuters” və “Bloomberg News” indi tək yeri paylaşmalı olacaq, “Associated Press” isə bu təsdiqlənmiş sistemdən kənarlaşdırılıb. Parisdə yerləşən “Agence France-Presse” təsdiq edilmiş sistemin bir hissəsidir, lakin üç agentliyin fərqli kateqoriyasına düşür və hazırda bu dəyişikliklərin təsirinə məruz qalmır.