ABŞ-ın Harvard Universiteti aşağı gəlirli ailələrdən təhsil haqqı tələb etməyəcəklərini açıqlayıb. Təhsil ocağının rəsmi saytında yer alan açıqlamaya görə, ölkənin aparıcı universitetlərindən biri olan Harvard rəhbərliyi universitetin amerikalı orta sinif ailələrinin uşaqları üçün daha əlçatan olması üçün bəzi qərarlar qəbul edib.

Harvard rəhbərliyi illik gəliri 200.000 dollardan az olan ailələrdən təhsil haqqı tələb etməyəcəklərini, illik gəliri 100.000 dollardan az olan tələbələrin təhsil haqqına əlavə olaraq yaşayış, nəqliyyat, yemək xərcləri və sağlamlıq sığortasını da qarşılayacaqlarını açıqlayıb.

Məktəb rəhbərliyi qərarın 2025-2026-cı tədris ilindən qüvvədə olacağını bildirib.

Universitetin prezidenti Alan Qarber bildirib ki, məktəbin maliyyə baxımından daha əlçatan olması bütün tələbələrin perspektivlərini genişləndirəcək və onların intellektual inkişafına kömək edəcək.

Məktəb şurası bildirib ki, bu qərar ABŞ ailələrinin təxminən 86 faizinin Harvardın dəstəyindən faydalanmasına imkan verəcək.