Keçmiş ABŞ prezidenti Co Baydenin dörd illik hakimiyyətdə olduğu müddətdə ABŞ-da sığınacaq istəyən Rusiya vətəndaşlarının qanuni iddiaları davam edərkən ölkəyə daxil olmasına icazə verildi.

Bununla belə, Britaniyanın “The Guardian” qəzeti yazır ki, Rusiya və keçmiş Sovet ölkələrindən olan vətəndaşlar keçən ilin yayından ABŞ-a daxil olduqdan sonra saxlanılıb. Bəzi şəxslərin 1 ildən artıqdır ki, saxlanıldığı, uşaqların valideynlərindən alındığı bildirilir.

Saxlanılan bəzi vətəndaşları müdafiə edən vəkil Yuliya Nikolaev deyib: “Rusiyalı müştərilərim mənə deyirlər ki, “Bizim qaldığımız həbsxanada məhbusların 80 faizi rusdur, qalan 20 faizi müxtəlif millətlərdəndir və qısa müddətə həbsxanada saxlanılır”. Yalnız ruslar və bir neçə digər keçmiş sovet ölkəsindən olanlar son dinləmələrə qədər saxlanılır”.

Rusiyalı fəal Vladislav Krasnov 2022-ci ildə Rusiyadan qaçaraq ABŞ-a sığındığını deyir. Krasnov 444 gün Luiziana ştatındakı təcridxanada saxlandığını bildirir. O, təcridxanadan azad edildiyini və sığınacaq məsələsinə baxmaq üçün məhkəmə iclasını gözlədiyini deyir.

ABŞ-dakı təcrübəsindən çox məyus olduğunu bildirən fəal bu ifadələri işlədib: “Bir məhbəsdən qaçarkən özümü başqa bir məhbəsdə tapdım”.

Krasnov həmçinin Rusiya müxalifət liderlərinə vəziyyətə diqqət yetirmədiklərinə görə qəzəbləndiyini bildirib.

Rusiya və digər keçmiş sovet ölkələrindən saxlanılan 300-ə yaxın şəxs ötən ilin noyabrında məhkəməyə müraciət edərək, onlara qarşı ayrı-seçkiliyə məruz qaldıqlarını və əsassız olaraq həbs edildiyini bildiriblər. Fevral ayında açıqlanan federal məhkəmə qərarı ilə iddia rədd edilib.

İddiaçılar arasında ötən ilin fevralında dünyasını dəyişən rusiyalı müxalifət lideri Aleksey Navalnının komandasında könüllü kimi çalışmış fəal Polina Quseva da var idi. 2024-cü ilin iyulunda ABŞ-a gəldiyini və saxlanılaraq Luizianadakı bir müəssisəyə göndərildiyini deyən Quseva, oradakı ABŞ İmmiqrasiya və Gömrük Mühafizəsi (ICE) əməkdaşlarının “Rusların azad edilmədiyini açıq şəkildə söylədiklərini” iddia edib.

Keçmiş dəniz zabiti Aleksey Demin də deyir ki, həyat yoldaşı ilə birlikdə ABŞ-a daxil olduqdan sonra onlar saxlanılaraq müxtəlif obyektlərə göndərilib. Demin bildirir ki, sığınacaq məsələsi ilə bağlı məhkəmə iclası fevral ayında keçirilməli idi, lakin aprel ayına qədər təxirə salınıb. Onun işinə baxılana qədər fəal Demin təxminən 300 gün həbsdə olacaq.