Donald Tramp ABŞ-ın keçmiş prezidenti Endrü Ceksonun təxminən 200 il əvvəl əkdiyi tarixi maqnoliya ağacının yığışdırılacağını açıqlayıb. Ağacın odunları isə “yüksək və nəcib məqsədlər üçün” saxlanılmalıdır.

Tramp Ağ Evdə tarixi ağacın kəsilməsini əmr edib və bunu “çox təhlükəli risk” adlandırıb.

Bu addım Trampın Ceki Kennedi Qızılgül bağını abadlaşdırmaqla bağlı mübahisəli planları fonunda atılıb. ABŞ-ın yeddinci prezidenti Endrü Cekson 1829-cu ildə vəfat etmiş həyat yoldaşının şərəfinə bu ağacın toxumlarını vətəni Tennessi ştatından gətiritdirmişdi. Bu simvolik ağac hətta bir müddət 20 dollarlıq əskinasın dizaynında da əksini tapmışdı.

Bununla belə, Tramp ağacın ciddi şəkildə zədələndiyini və artıq Ağ Ev üçün uyğun olmadığını söyləyərək, “Hər şeyin sonu gəlir” deyib. Ağ Evin girişində dayanan və Dövlət Yeməkxanasının pəncərələrinə kölgə salan bu nəhəng ağac Trampın sözlərinə görə, indi yığışdırılmalıdır.

Digər tərəfdən, ağacın odununun qiymətləndiriləcəyini bildirən Tramp, “Başqa yüksək və nəcib məqsədlər üçün istifadə olunacaq” dedi. Bu açıqlama sosial şəbəkədə bəzi istifadəçilərin zarafatına çevrilib. “Irish Star”ın xəbərinə görə, bəzi insanlar Trampın özü üçün xüsusi taxt hazırlamaq istədiyini iddia edib.

Bir “X” istifadəçisi belə şərh edib: “Tramp gələn həftə Endrü Ceksonun maqnoliya ağacını kəsir, çünki bu, “təhlükəsizlik riski”dir. Görünür, bu yaşlı ağac onun diqqətini çəkə bilər. Ağac “daha yüksək və daha nəcib məqsədlər” üçün saxlanılacaq. Bu nə ola bilər, xüsusi hazırlanmış taxt?”