ABŞ prezidenti Donald Trampın Qətərin göndərdiyi təyyarədən istifadə tələbi təhlükəsizlik həyəcanına səbəb olub.

Tramp Qətər hökumətinin hədiyyə etdiyi 400 milyon dollarlıq “Boeing 747-8”dən rəsmi təyyarəsi kimi istifadə etmək istəyir. ABŞ prezidenti Qətərin göndərdiyi təyyarənin hazırkı “Air Force One”dan daha yeni olduğunu bildirir. Trampın rəsmi təyyarəsinin təxminən 40, Qətər tərəfindən göndərilən “Boeing”in isə 13 yaşı var.

Digər tərəfdən, ABŞ prezidentini daşıyan “Air Force One” təyyarəsi Amerika ordusunun təyin etdiyi standartlara uyğun dizayn edilib.

“The Washington Post” (WP) ilə əlaqə saxlayan ABŞ rəsmiləri Qətər tərəfindən göndərilən təyyarələrin bu standartlara uyğun təmirinin milyardlarla dollara başa gələcəyini və çox uzun vaxt aparacağını bildiriblər.

Mütəxəssislərin fikrincə, Trampın administrasiyası dövründə təyyarənin “Air Force One”a çevrilməsi çətin ki, baş tutsun.

“Air Force One”ın texniki xüsusiyyətləri ilə tanış olan keçmiş ABŞ rəsmisi təyyarəni “nüvə keçirməyən komanda mərkəzi” kimi təsvir edir. Adının çəkilməsini istəməyən rəsmi bildirib ki, Qətər tərəfindən göndərilən “Boeing”in bu səviyyəyə çatdırılması üçün ABŞ Hərbi Hava Qüvvələri təyyarəni söküb sıfırdan dizayn etməli olacaq.

ABŞ Hərbi Hava Qüvvələrinin keçmiş katibi Frank Kendall əks-kəşfiyyat məsələsinin də əhəmiyyətli bir risk olduğunu vurğulayır: “Təyyarədə heç bir dinləmə qurğusunun yerləşdirilmədiyinə əmin olmalıyıq”.

ABŞ-ın keçmiş prezidenti Barak Obamanın komandasında işləmiş, məxfi xidmətin təqaüdçü agenti Mak Plihkik də oxşar açıqlama verib: “Bu təyyarəni skeletinə qədər sökməli və sonra yenidən yığmalısınız. Hər bir hissənin təhlükəsizliyi böyük əhəmiyyət kəsb edir”.

Digər tərəfdən, rəsmilər deyirlər ki, Tramp prosesi sürətləndirmək üçün bu təhlükəsizlik yoxlamalarından bəzilərini etdirməyə bilər.

Qətər tərəfindən göndərilən təyyarə fevralın 15-də Dohadan Floridadakı “Palm Beach” hava limanına gətirilib. Tramp da qolf oynamağa gedərkən təyyarəni ən azı bir saat gəzib.

Tramp, ilk səlahiyyət müddətində “Air Force One”ı əvəz etmək üçün “Boeing” ilə müqavilə imzalayıb, lakin təyyarələrin 2027-ci ilə qədər təhvil verilməsi ehtimalı azdır.