Qətər şeyxinin ABŞ prezidenti Trampa bağladığı 400 milyon dollarlıq dəbdəbəli təyyarə müqaviləsi Pentaqonun “biz bunu aldıq” iddialarına baxmayaraq hələ yekunlaşmayıb. Bu gecikmə ona görədir ki, iki ölkə arasında satış hədiyyə kimi göstərilir.

Amerikanın “The Washington Post” qəzetinin iddialarına görə, ABŞ və Qətər hökumətlərini təmsil edən hüquqşünaslar ABŞ prezidenti Donald Trampın rəsmi təyyarə olaraq tələb etdiyi lüks “Boeing 747-8” sərnişin təyyarəsinin təhvil verilməsi üçün razılığa gələ bilməyib.

ABŞ Müdafiə Nazirliyi bu yaxınlarda sövdələşmənin tamamlandığını və təyyarəni aldıqlarını iddia etmişdi.

Mənbələrin bildirdiyinə görə, Qətər rəsmi sənədlərdə təyyarənin təhvil verilməsinin Tramp administrasiyasının təşəbbüsü olduğunun qeyd olunmasında israr edib.

***

Gecikmə Trampın əvvəlcə iki ölkə arasında alqı-satqı olan müqaviləni “hədiyyə”yə çevirmək üçün israrlı səyləri ilə bağlıdır.

Tramp Oval kabinetdə jurnalistlərə təyyarə haqqında danışarkən, “ABŞ Hərbi Hava Qüvvələri üçün gözəl, böyük, möhtəşəm pulsuz təyyarə aldım. Bununla çox qürur duyuram”, – demişdi.

***

ABŞ prezidenti əvvəlcə Qətərin ona əl uzatdığını və lüks təyyarəni pulsuz təklif etdiyini bildirib. Lakin iddialara görə, təyyarə almaqla bağlı Qətərə müraciət edən ilk şəxs Tramp olub. Satışla bağlı müzakirələr daha sonra Qətərin təyyarəni hədiyyə etməyə razı olması ilə yekunlaşıb.

Ağ Evin sözçüsü Anna Kelli bildirib ki, təyyarənin ABŞ-a pulsuz veriləcəyinə heç bir şübhə yoxdur.

***

Kelli “The Washington Post”a, “Prezidentin dediyi kimi, bu, ABŞ Hərbi Hava Qüvvələrinə hökumətdən hökumətə hədiyyə olacaq”, – deyib.

Tramp hətta öz partiyası tərəfindən də tənqid olunsa da, Qətər təyyarənin Trampa şəxsi hədiyyə olmadığını, “hökumətlərarası sövdələşmə” olduğunu iddia edib.