ABŞ prezidenti Donald Tramp və Çin prezidenti Si Cinpinin ötən həftəki telefon danışığından sonra dünən ABŞ və Çinin yüksək səviyyəli nümayəndə heyətləri ticarət müharibəsinə son qoymaq üçün danışıqlara başlayıb.

Dünən Londonda ABŞ və Çin arasında ticarət danışıqlarının ilk raundu başlayıb. Danışıqların bu gün davam edəcəyi açıqlanıb. ABŞ Çinin nadir torpaq elementlərinin daşınmasına qoyulan məhdudiyyətləri yüngülləşdirməyə zəmanət verməsi müqabilində bəzi texnoloji ixrac məhdudiyyətlərini qaldırmağa hazır olduğunu bildirib.

Məsələ ilə tanış olan mənbələrə görə, Tramp administrasiyası çip dizaynı proqramı, reaktiv mühərrik hissələri, kimyəvi maddələr və nüvə materiallarını hədəf alan bir sıra tədbirləri ləğv etməkdə xüsusilə maraqlıdır. ABŞ prezidenti Donald Tramp dünən axşamkı danışıqları dəyərləndirərkən, “Çin ilə münasibətlərimiz yaxşı gedir. Çin asan ölkə deyil. Mən yalnız yaxşı xəbərlər alıram”, – deyib. ABŞ-ın ticarət naziri Hovard Lutnik danışıqların “məhsuldar” olduğunu, maliyyə naziri Skott Bessent isə “yaxşı görüş” olduğunu deyib.

Bununla belə, Ağ Evin Milli İqtisadi Şurasının direktoru Kevin Hassett “Nvidia Corp.” tərəfindən istehsal edilən çiplərin bu güzəştə daxil edilməyəcəyini açıqlayıb. Sözügedən güzəştlərdən danışan Hassett, “Çox, çox yüksək səviyyəli “Nvidia” məhsullarından danışmıram”, – deyib və süni intellekt xidmətlərini öyrətmək üçün istifadə edilən “Nvidia H₂O çiplərinə qoyulan məhdudiyyətlərin qaldırılmayacağını vurğulayıb. Bununla belə, qlobal bazarlar ticarət müharibəsində gərginliyin azaldığını göstərən və razılaşmanın əldə olunacağına ümid verən bəyanatlarla dolu idi.

“Treasury Partners”dən Riçard Saperşteyn, “Bazarlar tariflərin gecikdiriləcəyi və ilkin elan ediləndən daha mülayim olacağı ilə bağlı fikirdə idi. Biz bazarların başlıqlara həssas qalacağını gözləyirik, çünki ticarət razılaşmaları danışıqlar üçün vaxt tələb edir və hər hansı narahatedici tarif xəbərləri əhəmiyyətli dəyişkənliyə səbəb olacaq”, – deyib.