Amerikalı iş adamı Corc Soros Texas ştatında demokratları gücləndirmək üçün hərəkətə keçib. “The Wall Street Journal” (WSJ) xəbər verir ki, Soros respublikaçıların əlində olan ştatda demokratları gücləndirmək üçün “Mavi Texas” hərəkatına sərmayə qoyur.

Bildirilir ki, Budapeşt əsilli iş adamı ötən il hərəkata 2,1 milyon dollar bağışlayıb, bu ilin aprelində isə 1 milyon dollar vəsait ayırıb. Təşəbbüsün 2024-cü il seçki kampaniyası zamanı 35 milyon dollar xərclədiyi bildirilir və qarşıdan gələn seçkilərdə bu rəqəmin aşılacağı proqnozlaşdırılır.

Qısa müddətdə “Mavi Texas” hərəkatı 2026-cı ildə keçiriləcək aralıq seçkilərdə seçici fəallığını və namizədlərin işə qəbulunu artırmağı hədəfləyir.

Uzunmüddətli perspektivdə, Demokrat Partiyasının 2032-ci ilə qədər Texasda Respublikaçılara meydan oxumaq üçün siyasi rəqabət gücü əldə etməsi hədəflənir.

Bu çərçivədə bu aydan etibarən 20-dən çox şəhərdə könüllü səfərbərlik, namizəd seçimi və müxtəlif aksiyaların keçirilməsi planlaşdırılır.

Demokratlar 1994-cü ildən bəri Texasda ştat miqyasında qələbə qazana bilməyiblər. Son seçkilərdə ABŞ prezidenti Donald Tramp və respublikaçılar demokratları böyük fərqlə məğlub ediblər.

Sorosun dəstəklədiyi təşəbbüs xüsusilə 2026-cı il aralıq seçkilərində Demokrat Kolin Ollredi Senata gətirmək məqsədi daşıyır. Ollredin Respublikaçı rəqibi, Texas Baş prokuroru Ken Paxton üzərində qələbə qazanması üçün intensiv kampaniya planlaşdırılır.

“WSJ”nin təhlili, Kaliforniya və Nyu-York kimi ştatlarda əhalinin azalması və Texasda yaşayanların sayının artması ilə cənub əyalətinin Demokratların gələcək seçki strategiyası üçün çox vacib hala gəldiyinə diqqət çəkir.

“Mavi Texas” təşəbbüsünün qabaqcıllarından biri olan “Texas Majority PAC”ın direktor müavini Katerin Fişer bunları deyir: “Texasda və ya ölkədə 2032-ci ildən sonra Ağ Evdə bir Demokrat görmək istəyənlər üçün bütün yollar Texasdan keçir”.