Rusiya Prezidenti Vladimir Putin, ABŞ-dan gələn hədələri ciddiyə almır və Ukraynada müharibəni daha da gücləndirməyə, əlavə əraziləri ələ keçirməyə hazır görünür.

Adlarının açıqlanmaması şərti ilə “Reuters”ə danışan Kremlə yaxın olan üç mənbənin sözlərinə görə, Putin nə iqtisadi sanksiyalara, nə də hərbi təzyiqlərə baxmadan döyüşmək niyyətindədir. Mənbələrdən biri qeyd edir ki:

“Putin hesab edir ki, bu günə qədər onunla heç kim – amerikalılar da daxil olmaqla – sülhün detalları barədə ciddi şəkildə danışıqlar aparmayıb. Buna görə də, o, öz məqsədlərinə çatana qədər mübarizəni davam etdirəcək”.

Putinin irəli sürdüyü sülh şərtləri aşağıdakılardır:

Ukraynanın NATO-ya üzv olmaması,

NATO-nun şərqə doğru genişlənməməsi,

Ukraynanın hərbi baxımdan neytral qalması,

Krım, Donetsk, Luqansk, Zaporojye və Xersonun Rusiya ərazisi kimi tanınması.

Hazırda Rusiya ordusu Ukraynanın təxminən 20 faizini nəzarətdə saxlayır. Son üç ayda Kremlin qüvvələrinin 1415 kv.km-lik irəliləyiş əldə etdiyi qeyd olunur. Mənbələr bildirir ki, Ukraynanın müdafiə sistemi tamamilə çökənədək Putin savaşı davam etdirə və yeni ərazi iddiaları irəli sürə bilər. Bu baxımdan, Dnepr, Sumı və Xarkov şəhərləri növbəti hədəflər kimi göstərilir.

Digər tərəfdən, ABŞ Prezidenti Donald Tramp Almaniyadan Ukraynaya “Patriot” hava hücumundan müdafiə sistemlərinin göndərilməsinə başlanıldığını elan edib. 14 iyulda isə Tramp bəyan etmişdi ki, əgər Rusiya 50 gün ərzində Kiyev ilə razılaşmaya gəlməsə, Moskvaya qarşı tətbiq olunan gömrük tariflərini 100 faiz artıracaq.

Kremlə yaxın mənbələr Tramp haqqında bunları deyir: “Putin anlayır ki, Tramp qeyri-sabit və proqnozlaşdırılması çətin bir siyasətçidir. Onu qəzəbləndirməmək üçün müxtəlif manevrlər edir”.

CNN isə bildirir ki, Putin bu 50 günlük pəncərəni savaşı genişləndirmək və daha çox ərazi ələ keçirmək üçün fürsət hesab edə bilər.