Sorğuda iştirak edən müstəqil seçicilərin yalnız üçdə biri ABŞ Prezidenti Donald Trampın ikinci dönəmdəki fəaliyyətini bəyənir.

Yeni sorğuya görə, ABŞ Prezidenti Donald Trampın reytinqi bir faiz azalaraq 40 faizə enib. Bu, Trampın ikinci prezidentlik müddətində qeydə alınmış ən aşağı səviyyədir.

“Reuters”/”Ipsos” tərəfindən 1023 amerikalı yetkin şəxsin iştirakı ilə aparılan və bazar ertəsi tamamlanan sorğu Trampın fəaliyyətinə dair ölkə daxilində dərin parçalanmanın davam etdiyini göstərib. Respublikaçıların təxminən 83 faizi onun fəaliyyətini bəyənərkən, Demokratların yalnız 3 faizi Trampın addımlarını dəstəkləyir.

Tramp üçün yaxşı xəbər də var: Sorğuda iştirak edənlərin 38 faizi onun iqtisadi siyasətini dəstəkləyib. Bu göstərici iyulun ortasında 35 faiz idi. Miqrasiya siyasətini bəyənənlərin nisbəti isə 43 faizə çatıb – bu da bir neçə həftə əvvəlki 41 faizdən yuxarıdır.

Lakin Tramp, əsas seçici bazalarından biri olan kişilər də daxil olmaqla, başqa sahələrdə də itkilər verir.

“CBS”/”YouGov”un ötən həftə yayımladığı sorğuya görə, Trampın ikinci müddətində kişilər arasında reytinqi aşağı düşməkdədir. Kişilərin 47 faizi onun fəaliyyətini bəyəndiyini, 53 faizi isə narazı olduğunu bildirib.

2024-cü ilin oktyabrında keçirilən ikinci seçkilərdən əvvəl “CBS”/”YouGov”un bənzər sorğusunda kişilərin 54 faizi Trampı dəstəkləyirdi və 64 faizi onun güclü lider olacağını düşünürdü.

Ümumilikdə bu eniş, Trampın ikinci prezidentlik dövrünə dair daha geniş bir narazılığı əks etdirir. “DecisionDeskHQ”nun sorğu ortalamaları prezidentin ümumi reytinqinin yanvardan bu yana 12 faiz azalaraq 56 faizdən 44 faizə endiyini göstərir.

Yeni “CBS”/”YouGov” sorğusuna əsasən, kişilərin 47 faizi Trampın deportasiyalara “həddindən artıq” diqqət yetirdiyini, 33 faizi isə bunu “uyğun səviyyədə” hesab edir. Digər göstəriciyə görə, kişilərin 65 faizi Trampın qiymətləri aşağı salmaq üçün kifayət qədər səy göstərmədiyini deyir, yalnız 29 faizi onun bu istiqamətdə çalışdığını düşünür.

“Gallup” tərəfindən ötən həftə keçirilən digər bir sorğu Trampın reytinqini 37 faiz olaraq müəyyənləşdirib. Bu isə onun prezidentliyi dövründə reytinq sorğularında qeydə alınmış ən aşağı göstəricidir.

Sorğular göstərir ki, Trampın reytinqini aşağı salan əsas üç mövzu, əslində kişiləri əvvəldən ona cəlb edən başlıca faktorlardır. Bu isə, seçki öncəsi Respublikaçılar üçün ciddi problem yarada bilər.

Trampın reytinqi, seçici bazası və partiyasındakı bəzi sadiq tərəfdarlarının "Epşteyn sənədləri" ilə bağlı onun davranışını sual altına alması ilə yanaşı, Respublikaçılar üçün çətin bir dövrdə enməkdə davam edir.

Prezident, rüsvayçı Nyu-York maliyyəçisi və cinsi cinayətkar Cefri Epşteyn barədə bildikləri ilə bağlı şəffaf olacağına söz vermişdi. Epşteynlə Tramp arasında uzun və sənədləşdirilmiş dostluq mövcud olub.

ABŞ Ədliyyə Naziri Pam Bondi, masasında Epşteynin “müştəri siyahısı” olduğunu açıqladıqdan sonra administrasiya geri addım ataraq belə bir sənədin olmadığını iddia edib. Eyni zamanda, Epşteynin uşaq istismarı ilə bağlı məhkəməyə çıxarılmağı gözləyərkən Nyu-York həbsxanasında intihar etdiyi yönündəki əvvəlki versiya da təsdiqlənmiş olub.