ABŞ rəhbərliyi, viza sahiblərinin ölkədə qalma müddətlərini məhdudlaşdırmağı nəzərdə tutan yeni bir qayda layihəsi hazırlayıb. Layihə, xarici tələbələr və mədəni mübadilə proqramı iştirakçılarını da əhatə edir.

ABŞ Daxili Təhlükəsizlik Nazirliyinin açıqlamasında bildirilib ki, sözügedən qayda layihəsi, qüvvədə olan viza sahiblərinin ABŞ-da qalma müddətini məhdudlaşdırmağı hədəfləyir. Layihə qüvvəyə minərsə, xarici tələbələr və ABŞ-da işləməyə icazə verilmiş mədəni mübadilə proqramı iştirakçıları ölkədə maksimum dörd il qala biləcəklər.

Bundan əlavə, xarici media nümayəndələrinin viza müddəti 240 günlə məhdudlaşdırılacaq. Açıqlamada vurğulanıb ki, əvvəlki idarələr uzun müddət xarici tələbələrin və digər viza sahiblərinin ABŞ-da demək olar ki, limitsiz qalmasına icazə veriblər. Bu vəziyyətin təhlükəsizlik riski yaratdığı və ABŞ vətəndaşlarını çətin vəziyyətə saldığı bildirilib.

Qeyd edək ki, sözügedən layihə ilk dəfə 2020-ci ildə Trampın ilk prezidentlik dövründə təklif olunmuş, lakin sabiq Prezident Co Baydenin idarəsi tərəfindən 2021-ci ildə geri çəkilmişdi. ABŞ rəhbərliyi həmçinin qüvvədə olan 55 min viza sahibinin vəziyyətini nəzərdən keçirərək viza ödənişlərinə 135% artım tətbiq etmişdi.