ABŞ Prezidenti Donald Tramp Rusiyanın 2022-ci ildə müharibənin başlanmasından sonra Ukraynaya ən böyük hava hücumunu həyata keçirməsindən bir neçə saat sonra Moskva üzərinə yeni sanksiyalar tətbiq etməyə hazır olduğunu açıqlayıb.

Tramp Ağ Evdə jurnalistlərin “Rusiyaya yeni sanksiyalar tətbiq etməyə hazırsınızmı?” sualını “Bəli, hazıram”, – deyə cavablandırıb, lakin əlavə detallar verməyib.

Ukrayna Hərbi Hava Qüvvələrinə görə, Rusiya şənbə gecəsi Ukraynaya 810 pilotsuz uçuş aparatı (PUA) göndərib. Bunlardan 747-si məhv edilib, əlavə olaraq 13 raketdən dördü vurulub. Hücum zamanı beş nəfər ölüb və Kiyev hökumət binası zədələnib.

Donald Tramp Rusiyanın müharibəni davam etdirmək üçün maliyyə mənbəyini zəiflətmək məqsədilə Rusiyadan neft alan ölkələri hədələyib. ABŞ Prezidenti bu səbəbdən Hindistana yüksək gömrük rüsumları tətbiq edib.

Sentyabrın 4-də Ukrayna Prezidenti Vladimir Zelenski, ABŞ-dakı həmkarının AB ölkələrinin Rus nefti almasına “heç də razı olmadığını” vurğuladığını bildirib.

ABŞ Maliyyə Naziri Skott Bessent isə açıqlayıb ki, ABŞ və Avropanın əlavə iqtisadi təzyiqləri Rusiya Prezidenti Vladimir Putini Ukrayna ilə sülh danışıqlarına məcbur edə bilər. Bessent NBC-nin “Meet the Press” proqramında, “ABŞ və Avropa Birliyi, rus nefti alan ölkələrə əlavə sanksiyalar və ikinci gömrük rüsumları tətbiq etsələr, Rusiya iqtisadiyyatı tamamilə çökməyə məhkum olacaq və bu da Prezident Putini danışıqlar masasına oturtacaq”, – deyib.

“Reuters”in məlumatına görə nazir Bessent Tramp administrasiyasının “Rusiyaya təzyiqi artırmağa hazır” olduğunu söyləyib: “Avropalı tərəfdaşlarımız da eyni yolu izləməlidir. Çünki ABŞ və Avropa Birliyi bunu birlikdə etsə, Ukrayna ordusunun nə qədər davam gətirə biləcəyi ilə Rusiya iqtisadiyyatının dayanıqlığı arasında bir yarışa girəcəyik”.

Tramp 2025-ci ilin yanvarında vəzifəyə başladıqda müharibəni tez bir zamanda sona çatdırmaq ümidində olub, lakin Ukraynadakı münaqişələri dayandıra bilmədiyindən məyusluq yaşayıb.

Tramp hələlik Rusiyanın və onun neftinin ən böyük alıcısı olan Çin üzərinə yeni sanksiyalar tətbiq etməkdən çəkinib, lakin Rusiyanın ən böyük enerji istehlakçılarından biri olan Hindistandan ABŞ-a edilən idxala tətbiq olunan gömrük rüsumlarını artırıb.

ABŞ Prezidenti Donald Tramp “CBS News”də açıqlamasında, “Rusiya Prezidenti Vladimir Putin və Ukrayna Prezidenti Vladimir Zelenski hələ sülh sazişi imzalamağa hazır deyillər, amma bir şeylərin olacağını və bunu bacaracağımızı bilirik”, – deyib.

Televiziya kanalına telefonla verdiyi müsahibədə Tramp Putin və Zelenski arasında birbaşa görüş ehtimalının qeyri-müəyyən olmasına baxmayaraq, Rusiya ilə Ukrayna arasında sülh sazişi əldə etmək üçün səylərini davam etdirəcəyini vurğulayıb.

ABŞ Prezidenti Rusiya, Ukrayna və ya digər münaqişə ölkələri ilə apardığı diplomatik danışıqlarda liderləri bir otaqda masaya oturtmaq, heç bir ehtimalı kənara atmadan və onları dərhal razılığa gətirməyə məcbur etmək yanaşmasını tətbiq etdiyini bildirib.