“Güclü Ermənistan” partiyasının lideri, Rusiyapərəst siyasətçi və milyarder Samvel Karapetyan Fransanın Nitsa şəhərində yerləşən dəbdəbəli villası yeni qalmaqalla mərkəzinə düşüb.

VAXT.AZ xəbər verir ki, məlumat Rusiyanın keçmiş oliqarxı Mixail Xodorkovski tərəfindən yaradılmış “Dosye” Araşdırma Mərkəzinin hesabatında yer alıb.

Karapetyan əslində bu villanın real sahibi deyil. Daşınmaz əmlakın maliyyələşdirilməsi “Qazprom” vasitəsilə həyata keçirilib.

Araşdırmada qeyd olunur ki, 2016-cı ildə Karapetyan villa ilə bağlı borcları bağlamaq üçün “Qazprom”a bağlı qurumlardan kreditlər əldə edib. Kreditlərin təminatı kimi isə məhz həmin villa göstərilib. Bununla yanaşı, daşınmaz əmlakın borclarının onun real bazar dəyərini üstələdiyi bildirilir.

Jurnalistlərin qənaətinə görə, villa faktiki olaraq “Qazprom”un vəsaitləri hesabına Karapetyanın istifadəsinə verilib. Araşdırmada vurğulanır ki, bu mexanizm nəticəsində əmlak formal olaraq milyarderin adına keçirilsə də, əsl maliyyə yükü Rusiya dövlət şirkətinin üzərində qalıb.

Hesabatda həmçinin qeyd edilir ki, daha əvvəl bir sıra mənbələr Alina Kabaevanın həmin villada vaxt keçirdiyini iddia etmişdi.

Samvel Karapetyan hazırda Ermənistanda keçiriləcək parlament seçkiləri öncəsi siyasi fəaliyyətini genişləndirməyə çalışır. Onun rəhbərlik etdiyi “Güclü Ermənistan” partiyası iyunun 7-də keçiriləcək seçkilərdə iştirak edəcək.

Bununla yanaşı, Karapetyan özü bir sıra cinayət işləri üzrə istintaq altındadır. Ona qarşı hakimiyyəti zorla ələ keçirməyə çağırışlar, çirkli pulların yuyulması və digər ittihamlar irəli sürülüb.

“Dosye” Araşdırma Mərkəzinin məlumatına görə, Kreml Ermənistan daxilində siyasi təsir imkanlarını artırmaq məqsədilə Karapetyana dəstək verir və bu istiqamətdə siyasi texnoloqlardan ibarət qrup ayırıb. Lakin qalmaqallar və biznesmenin açıq şəkildə Rusiyaya yaxın mövqeyi onun ölkə daxilində ciddi siyasi rəqibə çevrilməsini çətinləşdirir.