vaxtlı-vaxtında oxuyun! Bazar ertəsi, 27 iyun 2022
1 ABŞ dolları 1 USD = 1.7 AZN
1 Avro 1 EUR = 1.928 AZN
1 Rusiya rublu 1 RUB = 0.0258 AZN
1 İngiltərə funt sterlinqi 1 GBP = 2.2014 AZN
1 Türkiyə lirəsi 1 TRY = 0.3228 AZN
Əli bəy Hüseynzadə (1864 - 1940)

«Hürriyyət!.. O nə qüvvədir ki, zehinləri, fikirləri, xəyalları, bəşərin bütün ruh və mənəviyyatını sövq edir!»

Əli bəy Hüseynzadə (1864 - 1940)
CƏMİYYƏT  
18:23 | 17 iyun 2022 | Cümə Məqaləyə 531 dəfə baxılıb Şriftin ölçüsü Xəbərin şriftini kiçilt Xəbərin şriftini böyüt

Əhali icra hakimiyyətlərinə etibar etmir

Bir sorğunun üzə çıxardığı gerçək

MÖVZU İLƏ ƏLAQƏLİ

Azərbaycanda respondentlərin 88,1 faizi Prezident İlham Əliyevə tam etibar edir, 10,2 faizi isə əsasən etibar edir. Bu, Sosial Tədqiqatlar Mərkəzinin dövlət başçısının bu ilin ilk dörd ayı (yanvar-aprel) üzrə fəaliyyəti ilə bağlı keçirdiyi rəy sorğusu nəticəsində məlum olub.

Mərkəzdən bildirilib ki, məqsəd Prezidentin ictimai-siyasi fəaliyyətinin müxtəlif istiqamətləri, eləcə də bəhs edilən dövrdə həyata keçirilən başlıca tədbirlərə vətəndaşların münasibətini öyrənməklə müvafiq qərarların qəbulunda ictimai rəyə istinad edilməsinə şərait yaratmaqdır.

Respondentlərin Birinci vitse-prezident Mehriban Əliyevaya inam və etimad səviyyəsi də öyrənilib. Nəticələrə əsasən sorğu iştirakçılarının 78,9 faizi Birinci vitse-prezidentə tam etibar etdiyini, 15,6 faizi əsasən etibar etdiyini bildirib.

Rəy sorğusu əsasında hakimiyyətin digər qollarına, parlament və məhkəmə orqanlarına olan ictimai inam və etimad səviyyəsi öyrənilib. Sorğu iştirakçılarının 32,5 faizi Milli Məclisə tam etibar etdiyini, 37,7 faizi əsasən etibar etdiyini bəyan edib. Respondentlərin 4,7 faizi əsasən etibar etmədiyini, 22,2 faizi isə heç etibar etmədiyini bildirib. 3,0 faiz respondent bu istiqamətdə fikir bildirməkdə çətinlik çəkib.

Sorğu nəticələrinin təhlilinə əsasən, respondentlərin 37,6 faizi məhkəmələrə tam, 24,0 faizi isə əsasən etibar etdiyini bildirib. Rəyi öyrənilənlərin 15,6 faizi əsasən etibar etmədiyini, 17,2 faizi isə heç etibar etmədiyini qeyd edib. Respondentlərin 5,7 faizi bu istiqamətdə mövqe bildirməkdə çətinlik çəkib. Göründüyü kimi, məhkəmə institutlarına olan ictimai inam və etimadla parlamentə olan münasibət arasında uyğunluq müşahidə olunur.

Sorğu çərçivəsində vətəndaşların yuxarı icra orqanı kimi Nazirlər Kabinetinə və yerli icra hakimiyyəti orqanlarına inam və etimadı da öyrənilib. Sorğu iştirakçılarının 35,8 faizi Nazirlər Kabinetinə tam, 36,0 faizi əsasən etibar etdiyini bildirib. Əks mövqedən çıxış edənlər isə ümumilikdə 23,6 faiz təşkil edib (5,4 faizi əsasən etibar etmir, 18,2 faizi heç etibar etmir). Başqa sözlə, təqribən hər dörd respondentdən biri Nazirlər Kabinetinə etibar etmədiyini bildirib. 4,6 faiz respondent mövqe bildirməkdə çətinlik çəkib.

Sorğu iştirakçılarının 22,7 faizi yerli icra hakimiyyəti orqanlarına tam, 22,8 faizi əsasən etibar etdiyini bildirib. 14,1 faiz respondent əsasən etibar etmədiyini, 37,3 faiz heç etibar etmədiyini qeyd edib. 3,2 faiz respondent qərarsız mövqe nümayiş etdirib.