Vyetnamın şimalını təsir altına alan “Yağı” qasırğasının yaratdığı fəlakət və qəzalarda ölənlərin sayı 21-ə yüksəlib. “Vietnam News” internet saytının məlumatına görə, bu barədə ölkənin Axın İdarəetmə, Fəlakətin Qarşısının Alınması və Nəzarət Departamentindən açıqlama verilib.

Açıqlamada “Yaği” qasırğası nəticəsində baş verən fəlakət və qəzalarda həlak olanlardan savayı itkin düşənlər də var.

Açıqlamada təbii fəlakət nəticəsində 229 nəfərin yaralandığı bildirilib və tayfun nəticəsində 8 min 17 evin zərər gördüyü paylaşılıb.

Açıqlamada, təxminən 110 min hektar çəltik sahəsinin su altında qaldığı vurğulanıb.

Açıqlamada tayfundan zərər çəkən bölgə sakinlərinin qida və sığınacaq probleminin diqqət mərkəzində olduğu, daşqın və sürüşmə baxımından yüksək riskli ərazilərdə yaşayanların təxliyə prosesinin davam etdiyi bildirilib.

Vyetnam administrasiyası tayfundan zərər çəkmiş bölgələrdə xilasetmə əməliyyatları aparmaq üçün minlərlə hərbçi təyin edib.

“Yaği” qasırğası səbəbindən ölkənin şimalındakı sahil şəhərlərindən 50 mindən çox insan təxliyə edilib.

Sentyabrın 3-də Filippinin şimal bölgələrini vuran “Yağı”nın səbəb olduğu güclü yağış, sel və torpaq sürüşmələri nəticəsində 20 nəfər həyatını itirib, 26 nəfər isə itkin düşüb.

Bildirilib ki, sentyabrın 7-də Çinin Haynan əyalətini vuran qasırğa 4 nəfərin ölümünə, 95 nəfərin yaralanmasına səbəb olub.