Mayın 29-da Rusiya prezidenti Vladimir Putin Fransanın yeni seçilmiş prezidenti Emmanuel Makronla görüşmək üçün Parisə səfər edib. Makron və Putin arasında iki ölkənin əməkdaşlığı, Suriya və Ukrayna məsələləri müzakirə olunub. Liderlər Suriya və Ukraynada münaqişənin qarşısının alınması üçün birgə çalışmaq barədə hazır olduqlarını bildiriblər. Eurasia Diary Rusiya və post-Sovet ölkələri üzrə ekspert Rəhim Rəhimovdan Makron-Putin görüşməsi haqında müsahibə götürüb.

- Versal sarayında Fransanın yeni seçilmiş prezidenti Emmanuel Makron və Rusiya prezidenti Vladimir Putin arasında görüş keçirilib. İki lider Suriyada terror təşkilatlarının zərərsizləşdirilməsi və Ukrayna məsələsi ilə bağlı müzakirələr aparıb. Sizin fikrinizcə, prezident Makron Suriya və Ukraynada müharibənin qarşısını almaq və vəziyyəti sabitləşdirmək üçün Vladimir Putinlə əməkdaşlıq edə bilərmi?

- Hər şeydən öncə bildirmək istəyirəm ki, görüşün 2016-ci ilin oktyabrında eks prezident Fransua Olland və Vladimir Putin arasında təşkil olunacağı gözlənilirdi. Lakin Putin Fransaya səfərdən imtina etdi. Səbəbi isə Ollandın Rusiyanı Suriyanın Hələb şəhərində müharibə cinayətləri törətməkdə günahlandırmasıdır. Makronun Rusiya lideri ilə görüşmək planı yox idi. Suriya və Ukrayna münaqişəsi məsələlərində Rusiya və Fransanın mövqeyləri arasında xeyli fərqlər var. Bir görüş ilə bu fərqləri həll etmək mümkün deyil. Suriya və Ukrayna münaqişəsində iki dövlət hələ razılığa gəlməyiblər.

- Putinin Makron ilə görüşməsi Rusiya çarı Birinci Pyotrun Versal sarayına səfərinin 300 illiyi ilə üst-üstə düşür. Siz necə fikirləşirsiniz, Putinin səfəri Rus diplomatiyası üçün hansı önəmli təsir bağışlayır?

- Təkrarən xatırlatmaq istəyirəm ki, Rusiya və Fransa arasında görüş 2016-ci ilin oktyabrında keçirilməli idi. Putinin Versal sarayında Makron ilə görüşü Birinci Pyotrun Versal sarayına səfərinin 300 illiyi ilə üst-üstə düşməsi sadəcə təsadüfdür. Bu görüşdə Putinin məqsədi Makronu ölkəsinin Rusiyaya qarşı sanksiyalardan çəkindirmək idi. Lakin Putin bu məqsədinə nail olmadı. Makron isə öz növbəsində Kremlə məxsus media orqanlarını ona qarşı təxribat yaymaqda günahlandırdı. Makron həmçinin onu da göstərməyə çalışırdı ki, o Almaniya kansleri Angela Merkel ilə birlikdə Avropada öz liderliyini nümayiş etdirmək və ABŞ-dan aslı qalmamaq fikrindədir. Hesab edirəm ki, Rusiyaya qarşı sanksiyalar uzun müddət davam edəcək.

- Sizin də xatırlatdığınız kimi, Prezident Makron Rusiya media orqanlarını prezident seçkisi zamanı onun kampaniyasına qarşı saxta məlumatlar yaymaqda tənqid edib. Sizcə, Rusiya mediasının Avropadakı siyasi proseslərdə rolu güclüdürmü?

- Rus mediası Avropadakı siyasi proseslərə təsir etməyə çalışır. Lakin Rusiya mediasının Avropada rolu çox şişirdilir. Maraqlıdır ki, Kreml bu vəziyyətdən istifadə edərək Rusiyanın post-sovet ölkələrində təsirini gücləndirir. Moskva bununla post-sovet ölkələrini Avropa İttifaqı ilə yaxın əlaqə qurmaqdan çəkindirir. Rusiyanın ABŞ-da keçirilən prezident seçkisinə müdaxiləsi barədə bəyanatlar Rusiya mediasını öz təsirini artırmaqda daha da ruhlandırır.