Frans-Press Agentliyinin (Agence France-Presse – AFP) məlumatına görə, Donald Tramp dünən (cümə axşamı) ABŞ-da noyabr ayında keçirilməsi planlaşdırılan prezident seçkilərində Respublikaçılar Partiyasının namizədliyini qəbul etdiyini açıqlayıb.

Viskonsin ştatının Milouki şəhərində partiya qurultayının son günündəki çıxışında Tramp, “Bu gecə mənim ABŞ prezidentliyinə namizədliyinizi irəli sürmənizi səmimiyyət və qürurla qəbul edirəm”, – deyib.

Tramp prezident seçkilərində “möhtəşəm qələbə” olacağını proqnozlaşdırıb və Ağ Ev uğrunda yarışda qalib gələrsə, Birləşmiş Ştatların “tarixinin ən yaxşı dörd ilini” yaşadacağını vəd edib.

Keçmiş prezident sui-qəsd cəhdindən bir neçə gün sonra etdiyi çıxışında “Mən Amerikanın yarısı üçün deyil, bütün Amerika üçün prezident olmağa namizədəm” deyərək özünü birləşdirici bir fiqur kimi göstərməsi diqqət çəkib.

Sui-qəsd cəhdindən sonra ilk çıxışında o, keçən həftə sonu təşkil etdiyi mitinq zamanı silah səsləri eşidəndə “hücum altında olduğunu” dərhal hiss etdiyini söyləyib: "Mən dərhal başa düşdüm ki, vəziyyət çox ciddidir və hücuma məruz qalmışıq, lakin Tanrı mənim tərəfimdə olduğu üçün özümü çox təhlükəsiz hiss edirəm”.

“Müxalifliyin kriminallaşdırılmamasına və ya fikir ayrılıqlarının iblisləşdirilməməsinə” çağıran respublikaçı namizəd yenidən ona qarşı aparılan məhkəmə prosesini tənqid edib. O, demokratlardan ona “demokratiyanın düşməni” damğasını vurmağı dərhal dayandırmağı tələb edib.

Respublikaçılar Partiyasının Konqresinə toplaşan minlərlə tərəfdarı qarşısında çıxış edən Tramp ABŞ-ı uğursuz və bacarıqsız idarəçilikdən xilas etməyin vacibliyini vurğulayıb.

“Mövcud administrasiyanın rəhbərliyi altında biz tənəzzülə uğrayan bir millətik” deyən Tramp, ABŞ-ın son illərdəki inflyasiyasını, immiqrantların sərhədə gəlişini və beynəlxalq münasibətlərin pisləşməsinə görə Demokratik rəqibi Co Baydeni məsuliyyətsizlikdə günahlandırıb.

Seçkidə qalib gəlsə, Tramp qeyri-qanuni miqrasiya böhranına son qoyacağını, vəzifəyə gəldiyi ilk gündə ölkə sərhədlərini bağlayacağını və ilk müddətinin əsas layihələrindən biri olan ABŞ-Meksika sərhədində divarın tikintisinə sona çatdıracağını vəd edib.