ABŞ-lı milyarder İlon Maskın rəhbərlik etdiyi Hökumətin Səmərəliliyi Departamentinin (DOGE) ABŞ Daxili Gəlir Xidmətinin (IRS) vergi ödəyicilərinin həssas məlumatlarına giriş əldə etməyə cəhd etdiyi iddia olunur.

“The Associated Press” (AP) adı açıqlanmayan iki mənbəyə istinadən xəbər verir ki, DOGE IRS tərəfindən istifadə edilən və məmurlara müəyyən vergi ödəyiciləri üçün hesab məlumatlarına dərhal baxmaq imkanı verən məlumat sisteminə daxil olmağa çalışır.

Hesabatda bildirilirdi ki, DOGE bu sistemə giriş əldə edərsə, Mask və komandası vergi ödəyicilərinin bank qeydlərini və digər həssas məlumatları ehtiva edən milyonlarla fayla daxil ola biləcək.

Bu arada hüquq ekspertləri vergi ödəyicilərinin qeydlərinin qeyri-qanuni şəkildə yayılmasının ABŞ vətəndaşlarını hədəf almaq və onların şəxsi həyatına müdaxilə etmək üçün istifadə oluna biləcəyindən narahatdırlar.

“Tullantı, fırıldaqçılıq və sui-istifadə çoxdan bizim pozulmuş sistemimizdə dərin kök salıb. Onları müəyyən etmək və aradan qaldırmaq sistemə birbaşa giriş tələb edir”, – Ağ Evin sözçüsü Harrison Fields elektron poçtla göndərdiyi bəyanatda bildirib.

“Amerika xalqı zəhmətlə qazanılan vergi dollarlarının hökumət tərəfindən necə xərcləndiyini bilməyə layiqdir, buna görə də DOGE aşkar etdiyi korrupsiyanı ifşa etməyə davam edəcək”, – deyə Filds vurğulayıb.

Elizabet Varren və Ron Uayden kimi bəzi Demokrat senatorlar, IRS rəhbəri Duqlas O'Donnellə ​​məktublar göndərərək, Mask və DOGE-yə giriş icazəsi verən bütün bildirişlərin surətlərini tələb etdilər.

Məktubda senatorlar DOGE-nin IRS sistemlərinə müdaxiləsinin vergi mövsümü ilə üst-üstə düşdüyünü qeyd edərək, müdaxilələrin vergilərin qaytarılmasını qeyri-müəyyən müddətə gecikdirə biləcək nasazlıqlara səbəb ola biləcəyindən narahatlıqlarını ifadə ediblər.

Məktubda deyilir: “Yazda ödənişlər üçün büdcə hazırlamış milyonlarla amerikalı üçün vergilərin geri qaytarılmasında hər hansı bir gecikmə maliyyə cəhətdən dağıdıcı ola bilər”.

IRS yanvarın 27-də başlayan bu ilki vergi mövsümü üçün 15 aprel tarixinə qədər 140 milyondan çox vergi bəyannaməsinin təqdim ediləcəyini gözləyir.

ABŞ Sosial Təminat Administrasiyasının (SSA) administratoru vəzifəsini icra edən Mişel Kinq DOGE-nin agentliyin məlumat bazasına giriş tələbindən sonra istefa verib.