Sahibkar İlon Mask tərəfindən idarə olunan ABŞ-nin Hökumətin Səmərəliliyi Departamentinin (DOGE) fəaliyyəti Ağ Evdə fikir ayrılığına səbəb olub.

Bu barədə “ABC News” mənbələrə istinadən məlumat yayıb.

“Bəziləri DOGE-nin fəaliyyətini bəyənir. Bəziləri isə Maskın getməsini səbirsizliklə gözləyirlər. Amma məsələ bundadır ki, o, tezliklə heç yerə getməyəcək”, – deyə məlumatda bildirilir.

Qeyd olunur ki, bəzi yüksək rütbəli məmurlar Maskın fəaliyyətindən narazılıqlarını bildirirlər, çünki onun metodlarının nəzarətdən çıxdığını düşünürlər. Bununla belə, Maskın Ağ Evin aparat rəhbərinin müavini Stiven Miller də daxil olmaqla xeyli tərəfdarları var. Bir çoxları Maskın Vaşinqtonda olduğu ilk bir neçə həftənin nəticələrindən məyus olsalar da, onun böyük sərvəti və siyasi nüfuzunu nəzərə alaraq müdaxilə etməkdə tərəddüd edirlər.

***

ABŞ dövlət qulluqçuları, əgər DOGE-nin tələbi ilə həftə ərzində yerinə yetirdikləri işlər barədə hesabat verməsələr, işdən çıxarılacaqlar.

Bu barədə ABŞ Prezidenti Donald Tramp Ağ Evdə jurnalistlərə departamentin sorğusuna laqeyd yanaşmağın nəticələrindən danışarkən xəbərdarlıq edib: “Əgər cavab verməsəniz, işdən çıxarılacaqsınız”.

Mask daha əvvəl bildirmişdi ki, onun idarəsi ABŞ dövlət qulluqçularına həftə ərzində gördükləri işlər haqqında beş əsas bənddən ibarət hesabat təqdim etməyi tələb edən elektron məktublar göndərir.

Ağ Evin mətbuat katibi Kerolayn Livitt məlumatına görə, DOGE-nin sorğusuna artıq ən azı bir milyon insan cavab verib.

“Bu tələbin məqsədlərindən biri bu insanların ümumiyyətlə mövcud olub-olmadığını müəyyənləşdirməkdir. Bizim nəhəng bir hökumətimiz var, bu, milyonlarla insan deməkdir. Heç kəs bilmir ki, hökumətdə kim işləyir, kim yox. Əgər cavab vermirsinizsə, deməli yoxsunuz”, – deyə Tramp DOGE-nin sorğusuna cavab verməyin zəruriliyini izah edib.

Daha əvvəl məlumat verilmişdi ki, Federal Təhqiqat Bürosu (FTB), Pentaqon, Dövlət Departamenti, Milli Kəşfiyyat və Daxili Təhlükəsizlik nazirliyi də daxil olmaqla bir sıra idarələrin rəhbərliyi öz əməkdaşlarına DOGE-nin tələbinə cavab verməməyi tapşırıb.