ABŞ-ın Çikaqo şəhərində Müqəddəs Patrik Günü qeyd etmələri çərçivəsində şəhərin mərkəzindəki Çikaqo çayı yaşıl rəngə boyanıb və bu il 70-ci dəfə keçirilən ənənəvi paradda minlərlə insan iştirak edib.

ABŞ-da hər il ən rəngarəng Müqəddəs Patrik Günü tədbirlərinə ev sahibliyi edən Çikaqoda bu il də bu ənənə pozulmayıb.

Minlərlə Çikaqolu səhər saatlarından başlayaraq Müqəddəs Patrik Günü qeyd etmələri üçün küçələri yaşıl paltar və kostyumlarla doldurdu.

Şəhərdə ilk hadisə, Çikaqo çayının boyanması yerli vaxtla səhər saat 10:00 radələrində başlayıb. Təbiətə zərər verməyən və formulası gizli saxlanılan maddə çayda üzən qayıqlardan suya buraxılıb.

Çikaqoda günün ikinci ən böyük hadisəsi minlərlə insanın iştirak etdiyi ənənəvi yürüş olub. Hər il martın 17-də qeyd olunan Müqəddəs Patrik Günü İrlandiyanın himayədarı olan Müqəddəs Patrikin xatirəsini anmaq üçün keçirilir. Xristianlığı İrlandiyaya 5-ci əsrdə gətirmiş hesab edilən Müqəddəs Patrik ölkənin dini və mədəni kimliyində əhəmiyyətli bir fiqur olaraq qəbul edilir.

Əvvəlcə dini bayram olan Müqəddəs Patrik Günü İrlandiya mədəniyyətini və irsini qeyd edən bir tədbirə çevrildi.