Çinin Hançjou şəhərində keçirilən Dünya Robot Yarışmasında ilk dəfə olaraq insanabənzər robotlar arasında döyüş yarışı keçirilib.

“Unitree Robotics” tərəfindən hazırlanmış dörd G1 modeli insanabənzər robot insan “məşqçiləri” tərəfindən uzaqdan idarə olunan rinqə çıxdı.

Çəkisi təxminən 35 kiloqram, boyu 132 santimetr olan robotlar iki mərhələdən ibarət yarışda rəqiblərinin başına və ya gövdəsinə yumruq və təpik zərbələri endirib, xal qazanıblar. Bir yumruq bir xal, bir təpik üç xal qiymətləndirilib. Düşən robotlar beş xal itiriblər.

***

Yarışma görüntülərində robotların hərəkətlərinin axıcı, lakin təsir gücünün zəif olduğu görülüb. Bununla belə, robotların hərəkətləri tamaşaçıları valeh edib.

Bəzi robotlar müvazinətini itirərək yerə yıxılsa da, əksəriyyəti qısa müddətdə ayağa qalxa bilib.

“Unitree”nin icraçı direktoru Vanq Qixin, döyüş hərəkətlərinin süni intellekt texnologiyası ilə robotlara öyrədildiyini və bu hərəkətlərin peşəkar idmançıların məlumatları ilə virtual mühitdə modelləşdirildiyini söylədi.

Jejianq Universitetinin tədqiqatçısı Li Gaofenq bildirib ki, Çin son altı ayda insanabənzər robot texnologiyasında böyük irəliləyiş əldə edib. Bu inkişaflar sürətlə rinqə köçürülüb.

***

Mütəxəssislərin fikrincə, bu cür görüşlər təkcə əyləncədən ibarət deyil. Robotlar bir-biri ilə döyüşərək öyrənirlər.

Eyni zamanda, tədqiqatçılar robotların işləmə tərzinə baxaraq, yeniləmələri necə edə biləcəklərini qiymətləndirirlər.

Döyüş kimi yüksək koordinasiya və reaksiya vaxtı tələb edən ssenarilər robotların elektron komponentləri və idarəetmə alqoritmləri üçün əla sınaq meydançaları yaradır. Robotlar bir-birini döyərək təkmilləşir.

Sənaye analitikləri iddia edirlər ki, bu görüşlər Çinin sürətlə inkişaf edən robot texnologiyasında hissetmə, reaksiya və idarəetmə sistemlərində yeniliklərə təkan verəcək.