Texnologiya yarışına, Birləşmiş Ərəb Əmirliklərinin (BƏƏ) bazara çıxardığı yeni və daha ucuz bir süni intellekt modeli qoşulub. Abu Dabidə yerləşən “Mohamed bin Zayed” Süni İntellekt Universiteti (MBZUAI) çərşənbə axşamı günü açıqlayıb ki, onlar “DeepSeek” və “OpenAI”yə rəqib ola biləcəyini ümid etdikləri aşağı maliyyətli bir məntiq modeli buraxıblar.

Yanvar ayında, Çin mərkəzli tədqiqat laboratoriyası “DeepSeek” bildirib ki, ABŞ mərkəzli “ChatGPT”nin inkişaf etdiricisi “OpenAI”nin nailiyyətlərini büdcəsinin və enerji istifadəsinin yalnız kiçik bir hissəsi ilə yaxından izləyir.

BƏƏ tərəfindən hazırlanmış “K2 Think” modeli maşın öyrənmə modellərinin məlumatı işləmə və proqnoz etmə formasını müəyyən edən parametr baxımından, “DeepSeek” də daxil olmaqla digər rəqiblərdən daha kiçikdir. Lakin layihənin tədqiqatçıları bildirirlər ki, “K2 Think”in performansı “OpenAI” və “DeepSeek”in məntiq modelləri ilə bərabərdir.

Universitetin mətbuat açıqlamasında deyilir ki, “K2 Think” yeni bir məntiq modeli sinfidir və “Məntiqi dərinliyi gücləndirmək üçün uzun düşüncə zənciri ilə nəzarət olunan incə tənzimləmə istifadə edir və sonra çətin problemlərdə düzgünlüyü artırmaq üçün doğrulanabilən mükafatlarla gücləndirilmiş öyrənməni tətbiq edir”.

MBZUAI-nin əsas modellər institutunun direktoru Hektor Liu CNBC-yə verdiyi müsahibədə, “Modelimizin xüsusiyyəti ondadır ki, ona bir modeldən çox sistem kimi yanaşdıq”, – deyib.

“Yəni, sadəcə modeli yayımlaya biləcəyimiz adi açıq mənbə modelindən fərqli olaraq, əslində modeli paylayırıq və zamanla modelin necə inkişaf edə biləcəyini görürük”.

MBZUAI həmçinin bildirib ki, bu, “mövcud olan süni intellekt ən sürətli və ən effektiv məntiq sistemlərindən biridir.” “K2 Think” saniyədə 2 min token, yəni təxminən 1 500 söz istehsal edə bilir.

“K2 Think” “Alibaba”nın “Qwen 2.5” böyük dil modeli üzərində qurulub və süni intellekt çip istehsalçısı “Cerebras”ın aparatında işlədilir.

“DeepSeek”in “R1” modeli kimi, “K2 Think” də açıq mənbə kodludur. Yəni təlim verilən məlumatlar və çəkilər ictimaiyyət üçün açıqdır.

Universitet açıqlayıb: “Bu yeni şəffaflıq səviyyəsi, modelin məntiqi necə öyrəndiyinin hər bir addımının qlobal tədqiqat icması tərəfindən incələnməsini, təkrarlanmasını və genişləndirilməsini təmin edir.”

Bu texnologiyanın qlobal süni intellekt yarışına mühüm təsirləri ola bilər. ABŞ və onu izləyən Çin üstünlüyünə baxmayaraq, digər ölkələr də süni intellekt sahəsində iz qoymağa çalışır.

““K2 Think”, BƏƏ-də süni intellekt üçün müəyyənedici bir addımdır. Açıq innovasiya və yaxın ictimai-xüsusi sektor tərəfdaşlıqları Abu Dabini Süni intellekt sahəsində qlobal lider kimi mövqeləndirə bilər və göstərir ki, məntiqin gələcəyi yalnız ölçü ilə deyil, yaradıcılıq və əməkdaşlıqla formalaşacaq”, – deyə MBZUAI bildirib.