Rusiyanın Ukraynaya hərbi müdaxiləsi fonunda Almaniyanın paytaxtında yerləşən xəstəxanalar genişmiqyaslı böhranlara qarşı xüsusi sivil müdafiə planı ilə silahlanır.

Avropada artan təhlükəsizlik narahatlıqları Almaniyanın Berlin şəhərində səhiyyə sisteminin fövqəladə hallara hazırlığını gündəmə gətirib. Berlin Senatı iki illik hazırlıq mərhələsinin ardından şəhərdəki xəstəxanaları əhatə edən yeni bir Sivil Müdafiə Planını tamamlayıb. Plan, yalnız pandemiya və texnogen fəlakətlər deyil, həm də müharibə şəraitində şəhərin təxliyəsi və səhiyyənin sabit fəaliyyəti kimi ssenariləri də nəzərə alır.

Detallar gizlidir – ancaq istiqamət aydındır

Berlinin Səhiyyə İdarəsinin koordinasiya etdiyi və “Sivil Müdafiə Xəstəxanaları” adı altında həyata keçirilən bu təşəbbüsə 12 vətəndaş xəstəxanası və 1 hərbi tibb müəssisəsi cəlb olunub. Planın dəqiq məzmunu təhlükəsizlik səbəbilə açıqlanmasa da, onun xəstələrin təxliyəsi, tibb təchizat zəncirinin qorunması və səhiyyə işçilərinin koordinasiyası kimi əsas sahələri əhatə etdiyi bildirilib.

Planın əsas motivasiyası isə Rusiyanın 2014-cü ildə Krımı ilhaq etməsi və 2022-ci ildə Ukraynaya hücumu ilə başlayan geosiyasi risklərin artmasıdır.

“Sülh dövründə hazırlıqlı olmaq məcburiyyətindəyik”

Berlin Əyalətinin Səhiyyə Senatoru İna Çiborra, yeni təhlükəsizlik reallıqları fonunda səhiyyə infrastrukturunun dayanıqlığını təmin etməyin vacibliyinə toxunub: “Təcili müdaxilə sistemimiz hazırdır, lakin sülh dövründə müdafiə gücümüzü artırmaq məcburiyyətindəyik. Bu cür planlar təkcə müharibə üçün deyil, istənilən kütləvi böhran halında əhalinin müdafiəsi üçün vacibdir.”

Berlin Xəstəxanalar Assosiasiyasının baş direktoru Mark Şrayner isə bildirib ki, hər il keçirilən adi fövqəladə hallar təlimləri müasir təhlükələrə cavab verməkdə artıq kifayət etmir. Onun sözlərinə görə, səhiyyə sistemi “hibrit təhlükələrə” və kiberhücumlar, enerji kəsintiləri, hərbi toqquşmalar kimi yeni risklərə qarşı daha ciddi hazırlıqlara ehtiyac duyur.

Hazırlanan planlarda səhiyyə sisteminin iflası, xəstə sayı və tələbatın partlayış səviyyəsində artması, tibb ləvazimatlarının qıtlığı və Berlinin mümkün təxliyəsi kimi ekstremal vəziyyətlər də nəzərə alınıb. Bu isə Almaniyanın artıq “sabit sülh dövrü”ndə olmadığını qəbul etdiyinin göstəricisi kimi şərh edilir.