ABŞ ilə Avropa Birliyi (AB) arasında gömrük vergiləri üzrə əldə edilən razılaşmadan sonra Almaniya Federativ Kansleri Fridrix Mers, bu razılaşmanın Almaniya iqtisadiyyatı üçün ciddi mənfi nəticələrə səbəb ola biləcəyi barədə xəbərdarlıq edib. Mers bazar ertəsi günorta saatlarında Berlində verdiyi açıqlamada bildirib: “Alman iqtisadiyyatı bu gömrük vergilərindən ciddi zərər görəcək”.

Mers əlavə edib ki, bu vəziyyət təkcə Almaniya və Avropa ilə məhdudlaşmayacaq: “Bu ticarət siyasətinin nəticələrini biz Amerikada da görəcəyik”.

Beləliklə, yalnız inflyasiya dərəcəsinin yüksəlməsi deyil, eyni zamanda gömrük vergilərinin ümumilikdə transatlantik ticarətə mənfi təsir göstərəcəyi qorxusu yaranıb.

Razılaşmada nələr var?

Aylarla davam edən çətin danışıqlardan sonra ABŞ və Aİ bazar günü yeni ticarət razılaşmasına gəldiklərini açıqlamışdılar. ABŞ Prezidenti Donald Trampın sözlərinə görə, razılaşma çərçivəsində Avropa məhsullarının böyük əksəriyyətinə 15 faiz gömrük vergisi tətbiq ediləcək. Bu göstərici, Trampın daha əvvəl təhdid etdiyi 30 faiz tarifdən aşağı olsa da, əvvəllər tətbiq edilən tariflə müqayisədə xeyli yüksəkdir.

Bundan əlavə, Avropa Birliyi ABŞ-dan daha çox maye təbii qaz almağı, Avropa şirkətləri isə ABŞ-a daha çox sərmayə yatırmağı öhdəsinə götürüb.

Avropanın ziyanına

Bununla belə, razılaşma ilə bağlı bir çox detal – məsələn, gələcəkdə ABŞ-dan idxal ediləcək mallara tətbiq olunacaq konkret tariflər – hələ də qeyri-müəyyən və ya tam aydın deyil.

Bir çox müşahidəçi bildirir ki, əldə edilən razılaşmanın əsas məqamları Avropanın ziyanına və olduqca birtərəfli xarakter daşıyır.

Fridrix Mers də əldə olunan razılaşmanın onun üçün qənaətbəxş olmadığını deyib: “Bu nəticə bizi razı sala bilməz. Amma mövcud durumda əldə edilə biləcək ən yaxşı nəticə idi”.

Mers əlavə edib ki, ABŞ ilə münasibətlərin cari vəziyyətini nəzərə aldıqda, bundan artıq bir nəticə əldə olunması qeyri-mümkün görünürdü.