Braziliya Prezidenti Luiz İnasio Lula da Silva, ABŞ Prezidenti Donald Trampın tətbiq etdiyi gömrük tariflərinə qarşı BRICS ölkələri ilə birlikdə diplomatik təşəbbüsə başlayacaqlarını bəyan edib.

Braziliya prezidenti, özünü qlobal nizamda çoxtərəfliliyi müdafiə edən lider kimi təqdim edərək, “Tramp çoxtərəfliliyi zəiflətməyə çalışır. Məqsədi ölkələrlə təkbətək razılaşa biləcəyi sistem qurmaqdır. Kiçik bir Latın Amerikası ölkəsi ABŞ qarşısında hansı bazarlıq gücünə sahib ola bilər? Heç birinə”, – deyə bildirib.

Hazırda BRICS-ə (Braziliya, Rusiya, Hindistan, Çin, Cənubi Afrika və digər inkişaf etməkdə olan ölkələr) sədrliyi edən Braziliya lideri, bu məsələni görməzdən gələ bilməyəcəklərini bildirib: “Tramp çoxtərəfli sistemləri niyə hədəfə alır? Məqsədi nədir? Bu suallara birlikdə cavab tapmalıyıq”.

Lula yaxın günlərdə Hindistanın Baş naziri Narendra Modi ilə görüşəcəyini, ardınca Çin Prezidenti Si Cinpin və digər BRICS liderləri ilə əlaqə saxlayacağını açıqlayıb. Məqsəd, Trampın tarif siyasətinə qarşı ortaq mövqe və diplomatik cavab mexanizmi hazırlamaqdır.

Lider, “Hər ölkə üçün bu vəziyyətin nə demək olduğunu müzakirə etməliyik. Ortaya ortaq bir qərar qoya bilmək üçün qarşılıqlı məlumat mübadiləsi vacibdir,” – deyib və BRICS-in “G20”də 10 ölkə ilə təmsil olunduğunu xatırladaraq onun qlobal təsir gücünə diqqət çəkib.

Trampdan BRICS ölkələrinə tarifə hücumu

Donald Tramp, ötən ay Rio-de-Jeneyroda keçirilən BRICS sammitində bu qrupu “Amerika əleyhdarı blok” adlandırmış və ölkələrə qarşı 10 faiz əlavə gömrük vergisi tətbiq olunacağı barədə xəbərdarlıq etmişdi.

Çin, Hindistan, Cənubi Afrika və Braziliya artıq ABŞ tərəfindən yüksək tariflərlə üzləşir. Xüsusilə Braziliya, keçmiş prezident Jair Bolsonaroya qarşı başlanılan istintaqlara görə Trampın hədəfində olub. ABŞ Braziliya məhsullarına 50 faiz rüsum tətbiq edib.

Çərşənbə günü isə Tramp, Hindistandan idxal olunan məhsullara əlavə 25 faiz tarif tətbiq olunacağını bildirib. Səbəb kimi Hindistanın Rusiyadan neft alması göstərilib. Bununla da Hindistana tətbiq edilən tariflər ümumilikdə 50 faizə çatacaq.

Çindən və Cənubi Afrikadan gətirilən məhsullar da 30 faizə qədər tariflə cəzalandırılır. Çin bəzi sahələrdə daha yüksək əlavə vergilərlə qarşılaşır.