ABŞ Prezidenti Donald Tramp, bu gün (avqustun 15-də) keçiriləcək zirvənin uğursuz olma ehtimalının 25 faiz olduğunu bildirərək, Alyaska görüşündən müharibəni dayandıracaq bir formul çıxmasa, Rusiyaya sanksiya tətbiq edəcəyini yenidən bəyan edib.

Tramp sabah Alyaskada Rusiya Prezidenti Vladimir Putinlə keçirəcəyi görüşdən ümidli olduğunu, amma dərhal atəşkəsin əldə olunmamasına da hazır olduğunu deyib.

ABŞ lideri “Fox News Radio”ya müsahibəsində Putinlə sabahkı görüş barədə danışaraq, “Bu ilk görüş ikinci görüşə hazırlıq olacaq. İkinci görüş çox vacibdir, çünki həmin görüşdə razılaşma əldə oluna bilər. Burada sərhədlər və torpaqlar mövzusunda müəyyən güzəştlər ediləcək”, – deyib.

O, bugünkü zirvənin uğursuz olma ehtimalının 25 faiz olduğunu qeyd edib. Tramp, Alyaska görüşündən sülh formulunun çıxmaması halında Rusiyaya sanksiya tətbiq edəcəyini bir daha təkrarlayıb.

ABŞ Prezidenti, “Mən daha çox təcili sülh razılaşması ilə, yəni tez bir şəkildə sülhün təmin olunması ilə maraqlanıram. Sabahkı görüşün nəticəsindən asılı olaraq Ukrayna Prezidenti Volodimir Zelenskini zənglə dəvət edəcəyəm və görüşün keçiriləcəyi yerə çağıracağam”, – deyib.

***

Tramp, mümkün atəşkəs prosesi barədə “Dərhal atəşkəsin təmin olunub-olunmayacağını bilmirəm, amma məncə bu baş verəcək” fikrini bildirib.

O, Putinin artıq razılaşmaq istədiyini düşündüyünü vurğulayaraq, ilk görüş uğurlu keçərsə dərhal Zelenskini arayacağını və bu iki liderin bir araya gələcəyi ikinci zirvəni təşkil edəcəyini qeyd edib.

Donald Tramp və Vladimir Putin sabah ABŞ-ın Alyaska ştatının Ankoric (Anchorage) şəhərində görüşəcəklər.