ABŞ Maliyyə naziri Skott Bessent, dünyanın iki ən böyük iqtisadiyyatı arasındakı tarif atəşkəsinin uzadılmasından sonra, Çin ilə mövcud ticarət vəziyyətinin “çox yaxşı işlədiyini” bildirib.

Bessent, ABŞ-ın Çin ilə mövcud gömrük vergisi tənzimləməsindən məmnun olduğunu söyləyib.

“Fox News”ə verdiyi müsahibədə, danışıqlarda nə vaxt irəliləyiş əldə ediləcəyi və gömrük vergilərinin gedişi səbəbindən ABŞ-ın ticarət razılaşmasına ehtiyacı olub-olmadığı soruşulan Bessent, Çin ilə gömrük vergiləri məsələsində çox razı olduqlarını bildirib: “Hazırda status-kvonun olduqca yaxşı işlədiyini düşünürəm”.

Bessentin bu sözləri, Tramp administrasiyasının noyabr ayında ticarət atəşkəsinin bitməsindən əvvəl Çin ilə münasibətləri sakit saxlamaq istədiyinin göstəricisi kimi şərh edilib.

Tramp administrasiyası Rusiya nefti idxalçısı Hindistana ikinci dərəcəli sanksiyalar açıqlamış, bundan sonra diqqət ən böyük Rusiya nefti alıcısı olan Çinə yönəlmişdi. İkinci dərəcəli sanksiyalar hələlik Hindistanla məhdudlaşsa da, müsahibəsində bu ölkəni hədəf alan Bessent, Hindistanlı zənginlərin Rusiya nefti ticarətindən böyük mənfəət əldə etdiyini qeyd edib.