İtaliyanın baş naziri Corca Meloni (Giorgia Meloni), “Picha” platformasında yayımlanan pornoqrafik görüntülərin məsul şəxslərinin ən sərt şəkildə cəzalandırılmalı olduğunu bildirdi.

Baş nazir Corciya Meloni, özü və digər qadınların fotolarının pornoqrafik internet saytında yerləşdirilməsindən “iyrəndiyini” deyərək, günahkarların dərhal müəyyən edilərək ən ağır şəkildə cəzalandırılmasını tələb edib.

“The Guardian” qəzetinin məlumatına görə, Meloninin bacısı Arianna və müxalifət lideri Elli Şlaynın fotoları da italyan platforması “Phica”da yerləşdirilib. Platforma bağlanmadan əvvəl 700 mindən çox abunəçiyə sahib idi. Rəhbərlik isə bağlanmanı platformadan yanlış istifadə olunması ilə izah edib.

Qaba və intim başlıqlarla yayımlanan fotolar şəxsi sosial şəbəkə hesablarından və ya açıq mənbələrdən icazəsiz götürülüb, qadınları seksual pozalarda göstərmək üçün dəyişdirilib. Skandal bir neçə məşhur qadının şikayətindən sonra üzə çıxıb və çoxsaylı qadın “Phica” və oxşar platformalara qarşı hüquqi addımlar atıb.

***

Meloni “Corriere della Sera” qəzetinə açıqlamasında belə deyib: “Olanlardan iyrənirəm. Təhqirə, alçaldılmaya və təcavüzə məruz qalan bütün qadınlarla həmrəylik və dəstəyimi ifadə etmək istəyirəm”.

Baş nazir, “2025-ci ildə hələ də bir qadının şərəfini tapdalamağı, onu cinsiyyətçi və qaba sözlərlə hədəf almağı, anonimlik və ya klaviatura arxasında gizlənməyi normal sayanların olması çox üzücüdür”, – deyib.

Keçən həftə “Meta” şirkəti kişilərin arvadlarının və ya tanımadıqları qadınların şəxsi fotolarını paylaşdıqları “Mia Moglie” (“Arvadım”) adlı italyanca “Facebook” hesabını bağlamışdı.

***

İtalyanca bir söyüşün səhv yazılışından götürülən “Phica” 2005-ci ildə yaradılıb və qadınların şikayətlərinə baxmayaraq fəaliyyətini davam etdirib. Polis mərkəzçi-sol Demokrat Partiyasının (PD) bir neçə siyasətçisinin rəsmi müraciətindən sonra istintaqa başlayıb. Saytın “VIP bölümü”ndə tanınmış qadınların dəyişdirilmiş fotoları yerləşdirilib.

Meloni “Corriere”yə açıqlamasında məsul şəxslərin “maksimum sərtliklə” cəzalandırılmasının vacibliyini bildirib: “Zərərsiz görünən məzmun yanlış əllərdə dəhşətli bir silaha çevrilə bilər. Hamımız bunun fərqində olmalıyıq”.

Milano Universitetinin 2019-cu ildə apardığı bir araşdırmaya görə, italyan qadınlarının 20%-nin şəxsi fotoları onların razılığı olmadan paylaşılmışdır.