ABŞ və İran arasında iki həftəlik atəşkəs razılaşmasının əldə olunmasından əvvəlki saatlarda Pakistan tərəflər arasında əsas vasitəçi rolunu oynayıb.

VAXT.AZ BBC-yə istinadən xəbər verir ki, Pakistan danışıqlar prosesində ABŞ və İran arasında mesajların ötürülməsini həyata keçirərək münaqişənin dayandırılması istiqamətində fəal rol oynayıb. Adının açıqlanmasını istəməyən Pakistanlı mənbə bildirib ki, danışıqlar intensiv şəkildə davam edib və prosesdə ölkə tərəfindən yalnız çox kiçik bir çevrə iştirak edib. Mənbənin sözlərinə görə, danışıqların ab-havası ciddi və gərgin olsa da, atəşin dayandırılması ilə bağlı ümidlər qalmaqda idi.

Bildirilir ki, Pakistan son həftələr ərzində tərəflər arasında vasitəçilik edərək mesajları qarşılıqlı şəkildə çatdırıb. Qonşu ölkə Iran ilə uzunmüddətli tarixi əlaqələrə malikdir bölüşür.

Pakistanın xarici işlər naziri İshaq Dar parlamentdə çıxışı zamanı bildirib ki, əvvəlki günlərdə prosesin müsbət istiqamətdə getdiyinə dair nikbinlik mövcud olub, lakin regionda baş verən yeni hücumlar vəziyyəti çətinləşdirib. O qeyd edib ki, Pakistan yenə də vəziyyəti mümkün qədər sabitləşdirməyə çalışır.

Pakistan Silahlı Qüvvələrinin baş komandanı Asim Munir isə regionda baş verən hücumların sülh səylərinə zərbə vurduğunu bildirib. Analitiklər hesab edirlər ki, Pakistanın bu mövqeyi İrana əlavə təzyiq yarada bilər, çünki ölkə Səudiyyə Ərəbistanı ilə müdafiə sazişinə malikdir.

Məlumata görə, gecə yarısından sonra Pakistanın baş naziri Şahbaz Şərif sosial şəbəkədə diplomatik səylərin davam etdiyini açıqlayıb və ABŞ prezidenti Donald Trampdan İrana verilmiş müddətin iki həftə uzadılmasını xahiş edib. O, həmçinin İranı Hörmüz boğazını eyni müddətə açmağa çağırıb.

Bundan bir neçə saat sonra Pakistan tərəfi atəşkəs razılaşmasının əldə olunduğunu elan edib və tərəfləri 10 aprel tarixində İslamabadda növbəti danışıqlara dəvət edib.

Bununla belə, mənbələr bildirir ki, əldə olunan razılaşma hələ də kövrək xarakter daşıyır və tərəflər arasında qarşılıqlı etimadın aşağı səviyyədə qalması səbəbindən vəziyyətin sabitliyi sual altında qalır.