Amerika Birləşmiş Ştatları Rusiyanı Suriyanın Şərqi Quta regionunun bombalanmasına görə tənqid edib və deyib ki, Moskva bu ay Qutada 400-dən çox adamın ölümünə görə «xüsusi məsuliyyət» daşıyır.

ABŞ Dövlət Departamenti Rusiyanı Suriya hökuməti üzərindəki nüfuzundan istifadə edərək ölüm hallarını dayandırmağa çağırıb. Bu arada ABŞ diplomatları Dəməşq yaxınlıqdakı Qutada 30 günlük atəşkəs tələb edən qətnamənin qəbuluna çalışırlar. Səsvermə fevralın 23-də BMT Təhlükəsizlik Şurasında keçiriləcək.

«Ölümlər baş verməzdi»

Dövlət Departamentinin sözçüsü Hizer Noyert (Heather Nauert) Rusiyanı Suriya prezidenti Bəşər Əsəd və ordusunun əməliyyatlarını əngəlləmədiyinə görə ittiham edib. Qutadakı silahlılara qarşı əməliyyat bu ay başlanıb, Rusiya və Suriya Hələbin geri alınmasından ötrü keçirilən qanlı kampaniyanın burada təkrarlana biləcəyini bildiriblər.

«Suriyada baş verən dağıntının, ölümlərin, qətllərin dayandırılması üçün nə edirlər? Rusiya Suriyanı dəstəkləməsəydi, bu dağıntılar, ölümlər baş verməzdi», – Noyert Vaşinqtonda jurnalistlərə deyib.

«Bu, Rusiyanın orada baş verənlərdən ötrü xüsusi məsuliyyət daşıdığını göstərir», – sözçü deyib.

Noyert həmçinin Moskvanı müvəqqəti atəşkəsi hədəfləyən BMT qətnaməsini əngəlləməkdə suçlayıb. Belə bir atəşkəs Qutadakı dinc sakinlərə yardımın çatdırılmasına imkan verərdi.

Rusiyanın BMT-dəki səfiri Qərbin hazırladığı bu qətnaməni rədd edib, bu da fevralın 23-də keçiriləcək səsvermədə veto ehtimalını qabardır.

Səfir Vasily Nebenzya deyib ki, media və qərb ölkələri Qutadakı döyüşlər barədə «dezinformasiya kampaniyası» aparırlar, Əl-Qaidə qruplaşmasına bağlı minlərlə yaraqlının burada yaşaması kimi «xoş olmayan həqiqət»i gözardı edirlər.

«Rusiyaya bel bağlayır»

Noyertin sözlərinə görə, Qutadakı döyüşlər Suriyayla bağlı Rusiyanın sponsorluq etdiyi danışıqların alınmadığını göstərir. Həmin danışıqlarda şərqi Quta «de-eskalasiya zonası» kimi müəyyənləşdirilmişdi, orada döyüş səngiməliydi.

«Bu, həmin de-eskalasiya zonasına necə bir farsa çevrildiyini göstərir», – Noyert söyləyib.

ABŞ-ın iqtisadi və sosial məsələlər üzrə səfiri Kelli Kürri (Kelley Currie) isə BMT-də bildirib ki, Əsəd Qutadakı düşmənlərini «bombalamaqla, acından qırmaqla» tabe etdirmək istəyir, Hələbdə, Hamada, Homsda da belə davranıb.

Onun sözlərinə görə, Əsəd qüvvələri Qutada yaşayan «400 min nəfəri bombalayarkən, qazla boğarkən», Rusiyanın BMT-də onu dəstəkləyəcəyinə bel bağlayır.

Suriya ordusu fevralın 22-də Qutaya vərəqələr buraxıb, sakinləri öz təhlükəsizliklərinə görə buranı tərk etməyə, üsyançıları isə təslim olmağa çağırıb. Hökumət Hələbi mühasirəyə alanda oraya da oxşar vərəqələr buraxmışdı.

Suriyanın BMT-dəki səfiri Bəşər əl-Cəfəri (Bashar al-Ja'afari) BMT şurasında deyib ki, Quta «ikinci Hələb»ə çevriləcək.